Zanin dar 7-ah India Vs Laos
Indira Gandhi Athletic Stadium, Guwahati-ah zanin dar 7:00 hian India leh Laos an inkhel dawn a, DD Sports-ah pekchhuah a nih dawn bakah AIFF website (www.the-aiff.com/live_match.htm)-ah a en theih bawk ang.
2019 Asian Cup khel tur zawnna first round khelh khatna chu Vientiane, Laos-ah kar liam ta Ningani khan khelh a ni tawh a, Mizo tlangval Jeje Lalpekhlua goal hmangin India an chak. Zanin hian Stephen Constantine hoten goal an chhuah lo a nih chuan India-in Third Round an lut ang, an vanduai a nih erawh chuan qualifier second round-ah Maldives leh Yemen inkhela chak lo zawk an hmachhawn leh dawn a ni.
Third Round hi team 24 awmna a ni a, heta ṭang hian team 12-in UAE-ah 2019 AFC Asian Cup an khel ang. Asia khawmualpui tana inelna sang ber khel tur hian team 12 - UAE, Qatar, South Korea, Japan, Thailand, Saudi Arabia, Australia, Uzbekistan, Syria, Iraq, Iran leh China PR te chu an tling tawh.
India (163-na) an vannei a, 2016 FIFA World Cup Qualifier-a an cheṭha lo chungin anmahni aia ranking hniam Laos (174-na) an hmachhawn hlauh. First leg-ah inkhel an thunun a, an chakna zat erawh goal khat chauh niin Mizo tlangval awm lo se coach Stephen Constantine hmalam hun a chiang lo lehzual ang.
Mohun Bagan striker Jeje Lalpekhlua chuan, "Team chhunga player tin hian mawhphurna an nei a, goal ka khung hian ka tihtur ka ti a ni. Round sang zawk thleng turin kan dinhmun a ṭha a, amaherawhchu kan fimkhur erawh a ngai ang. Laos hi kan dahhniam a thiang lo," tiin Vanglaini palai a hrilh.
Jeje hian Dutch coach Wim Kovermans-a hnuaia khelhna a hmu tam lo a, English coach Costantine-a hnuaiah erawh player pawimawh ber ang hiala sawi theih a ni. Hnahthial tlangval chuan, "Ram tana khel loin kum hnih chhung vel chu ka awl a, tunah chuan Pathian kaihhruaina zarah hliam vangin ka buai tawh lo. Constantine-a'n ka chungah rinna a nghat a, inrintawkna min neih let lehtir avangin a chungah ka lawm hle a ni," tiin a sawi.
Mizo tlangval hian malpui na avangin first leg a khel tluan lo a, he thu ziah lai hian second leg khel thei turin a dam ṭha tawhah ngaih ni mah se doctor-te'n a dinhmun an enfiah leh phawt ang.