NBA Finals, Game 2 Cleveland Cavaliers an chak lo nawn

LeBron James leh Cleveland Cavaliers chuan an dinhmun an la siam ṭha thei rih lo. Thawhṭanni zing khan 2016 NBA Finals Game 2 khelh a ni a, Golden State Warriors-in Cleveland lakah 110-77 in hnehna an chang.

Oracle Arena, Oak-land-a inkhelah champion lai Golden State tan Game 1-a assist vawi 11 ngawt neitu Draymond Green a langsar leh hle a, American power forward hian point 28 score-in MVP Stephen Curry-a'n court chhungah minute 25 chauh hun a hman chhungin point 18 a score bakah rebound vawi kua a la bawk a, best-of-seven series-ah 2-0 a hma an hruai theih nan an thawh hlawk hle.

Golden State hian Game 1-ah 104-89 a hneh-na an lo chan tawh avangin Game 2-ah pawh hian Cleveland hi an ngam hle mai a, quarter hmasa berah point liin hniam zawk mah se quarter dang zawngah an chungnung zawk vek a, a tawpa phei chuan point 33 zetin an sang fal tawh.

Cleveland-in beisei an phak lo chhunzawm a, point 19 score-tu an thiampuipa LeBron James chu quarter hnuhnung berah an chhawr tawh loh hial avangin quarter khat khelh tur la awmah chak an inbeisei tawh lo tih a chiang a, Game 3 lamah an rilru an pe tawh zawk niin lang.

MVP vawi li ni tawh James chuan, "Kawng eng-kimah keini aiin an chungnung zawk a, 50-50 ball-ah khan a chak lo zawkah kan ṭang zel. Inkhelh ṭan tirhah che fuh hmasa zawk mah ila an insiamṭhat hnuah kan tan tih theih a tam tawh lo," tiin an khelh chhiat zawk tih a pha lo.

Nikum NBA Finals-ah khan Golden State hian Cleveland hi an lo hneh tawh bawk a, tun hnai an intawn hnuhnung vawi sarihah hnehna an chan vek avangin an champion nomawi an humhim ngei dawn niin a lang tawh. Ningani zing dar 6:30 hian Warriors khelmualah Game 3 an khel leh ang.