Belgium-in Norway an hneh

Euro 2016 inpuahchahna inkhelah Belgium-in King Baudouin Stadium, Brussels-ah Norway chu 3-2 in an lehthal.

Pathianni zan inkhelah Red Devils (Belgium kohna) tan Romelu Lukaku-a'n minute thumna lekah goal hmahruai khung mah se Norway-in Bournemouth striker Joshua King hmangin minute 21-naah an sut a, second half ṭan aṭanga minute thumna lekah Veton Berisha hmangin hma an hruai zui bawk.

FIFA Ranking-a pahnihna hauh mek Belgium-in team ṭha zawk an nihna pholangin captain Eden Hazard (70') leh Lauren Ciman (73') te tauh goal hmangin hnehna an chang. Coach Marc Wilmots-a'n tlarhnungah Tottenham duo Jan Vertonghen leh Toby Alderweireld te chu defence laiah a chhawr a, season tawp lama harh tharna chang Chelsea midfielder Hazard leh Man City midfielder Kevin De Bruyne te chu player pawimawh an ni.

Inkhel dangah Serbia leh Russia te chu 1-1 in an inhnehtawk. Inrinni zana England hmachhawn tur Russia hian Zenit striker Artem Dzyuba hmangin minute 85-naah hma an hruai a, minute li hnuah Newcastle striker Aleksandar Mitrovic hmangin an sut.

Euro 2016 khel tur Czech Republic erawh South Korea lakah 2-1 in an tlawm. Hun chanve hma lamah South Korea-in Yoon Bit-garam leh Suk Hyun-ju hmangin hma an hruai a, Czech-in Marek Suchy hmangin goal khat khung mah se Theodor Gebre Selassie-a'n yellow card vawi hnihna a hmuh avangin Asia khawmualpui ram lakah an tho chhuak thei ta lo.

Ljubljana-ah minute 5-na leka Burak Yilmaz freekick hmangin Turkey-in Slovenia 1-0 in an hneh. Zanin dar 12:15-ah European Championship-a champion lai Spain-in Getafe khelmual Coliseum Alfonso Pérez-ah Georgia an mikhual ang.