Copa America Centenario Suarez tel loin Uruguay an tha tawk lo

Nimin zing khan Uruguay chuan an thiampuipa Luis Suarez tel loin Copa America-a an match hmasa ber an khel a, rin hlawh loh zawk Mexico lakah 3-1 in an tlawm - Suarez tel lohna Uruguay tlarhma an hriam tawk lo a, Edinson Cavani hoin beisei an phak lo.

Season hman zawh taka goal 59 khungtu Suarez hi Copa del Rey final-a Sevilla nen an inhmachhawn ṭumin hliam vangin lakchhuah a ni a, Uruguay squad zawm tawh mah se coach Oscar Tabarez chuan inkhel tura a la inpeih loh thu a lo sawi tawh - Barcelona thiampuipa hi Uruguay-in an mamawh tih an match hmasa ber aṭangin a lang nghal.

Mexico-in match 20 chhung chu hneh loh an tawng ta lo a, heng zinga match 10-ah hian a zawnin an chak thei bawk.

Inkhel chu

Inkhel ṭan aṭanga minute lina lekah Uruguay-in goal an chhuah nghal a, defender Alvaro Pereira chuan PSV Eindhoven winger Andres Guardado ball cross chu tum loh takin an lamah a ti lut. In rin hmaa goal chhuah Uruguay an insiamṭha thei lawk lo a, Mexico an hlauhawm chhunzawm - Javier Aquino chuan Mexico tana a hunṭha neih goal-ah a chantir thei lo.

Uruguay-in chance nei lo tawp an ni bik lo. Edinson Cavani chuan minute 30-naah hun ṭha a nei a, mah se Paris Saint-Germain forward hian Uruguay phurrit chhawk zângkhaina hun a neih hi a chhawr thei lo - Mexico goalkeeper Alfredo Talavera chuan ṭha takin a ball pet a lo dan sak.

Minute 45-naah Uruguay midfielder Matias Vecino chu a yellow card pahnihna a hmuh avangin hnawhchhuah a ni a, player 10 nena hun chanve khelh ngai Uruguay dinhmun a chhe sawt. Second half ṭan a ni a, beisei loh takin player kim loa khel Uruguay an hlauhawm zawk.

Cavani-a'n Diego Rolan tan ball duhthusam a pek hnuah Bordeaux striker hian an si phurh sutna goal a khung thei lo. Uruguay an hlauhawm chhunzawm zel a, Mexico an talbuai thung - minute 73-naah Andres Guardado chu a yellow card pahnihna avanga hnawhchhuah a ni a, freekick a chawi.

Uruguay-in Guardado hnawhchhuah an chhawr ṭangkai nghal. Carlos Sanchez chuan ama hlawhchhuah freekick hi a pet a, ball kal zel aṭangin Diego Godin chuan an si phurh sutna goal ni turin a khung - Uruguay an hlim a, Mexico an hawihai.

A tawpah a changtupa!

Mexico hnehna chan dan hi movie script writer-in thiam taka thawnthu a ziak ang mai a ni - goal hmahruai an khung zet hnuah an talbuai a, an si phurh an suttir a, an player an chan a, hun tawp nan minute nga chiah a awm tawh tihin goal hnih an khung!

Kum 37-a upa Mexico captain Rafael Marquez chuan a la tar lo tih pholang nawnin hun harsaah a team tan a ding chhuak a, minute 85-naah a vawi hnih nan a team hma a hruai pui. Porto captain Hector Herrera chuan injury time-ah goal khat dang a khung ve leh a, 3-1 in Mexico-in hnehna an chang.

Uruguay coach Oscar Tabarez-a'n an chak loh chhanah chhuanlam a zawng duh lo a, "Hun tawp hnaih lamah Mexico tak tak kan hmu a, min nawr nat em avangin goal hnih kan chhuah a, chak phu zawkin hnehna an chang a ni. Ka player-te an huaisenna avangin fak an phu a, player kim loa rei tak khel chungin chance tam tak kan insiam a ni," tiin a naute a sawisel duh lo.

Inkhel dang

Pathianni zan inkhelah Venezuela chuan Jamaica lakah 1-0 in hnehna an chang a, he inkhela goal awmchhun hi minute 15-naa Italian club Torino forward Josef Martínez khung a ni. Jamaican midfielder Rodolph Austin chu minute 23-na lekah hnawhchhuah a nih avangin Leicester City captain Wes Morgan-a te ram Jamaica tan thawh chhuah ngaihna a awm tawh lo.