French Open Tennis khawvel roreltu Novak Djokovic

Novak Djokovic chuan Andy Murray hnehin a vawi khat nan French Open nomawi a chawi a, tun dinhmunah world number 1 Djokovic hian Grand Slam title pali a kawl khawm mek!

Philippe Chatrier Court-a final khelhah Serbian tlangval Djokovic hian darkar thum leh minute thum chhungin Britain number 1 Murray hi 3-6, 6-1, 6-2, 6-4 in a hneh a, Grand Slam-ah vawi 12 a champion-na chiah niin kum 1969-a Rod Laver-a'n major tournament nomawi pali a kawl khawm vek hnua hetiang dinhmun luah leh thei hmasa ber a ni.

Kum 29-a upa Djokovic leh Murray te hi vawi 34 an inhma-chhawnna chiah a ni a, Djokovic hian vawi 24 hnehna chang tawhin tun hnai an inhmachhawn hnuhnung vawi 15-ah ṭum 13 ngawt hnehna changin mipa tennis-a amah hnaih bertu world number 2 Murray lakah a chungnung fal rih hle.

French Open-ah hian Britain mipa tennis player-te an hlawhltin lohna a rei tawh hle a, kum 1935-a Fred Perry a champion hnuah champion an la awm leh lo. Grand Slam vawi hnih champion tawh Murray hian tennis ngainatu Birtish mipuite duh leh beisei ang a thleng zo ta rih lo a ni.

Champion Djokovic hian pawisa €2,000,000 (Rs 15,19,02,736) bakah ATP Rankings points 2,000 a hmuh belh a, pahnihna Murray hian pawisa €1,000,000 (Rs 7,59,42,627) bakah ATP Rankings points 1,200 a hmuh belh ve bawk.

Hun ropui chu

Roland Garros-a hlawhtlinna a chan hnuah Djokovic chuan tennis a khelh hunchhunga a hun tawn ropui ber a nih thu a sawi. Serbian tlangval hian Don Budge (1938) leh Rod Laver (1962, 1969) te hnung zuiin Grand Slam nomawi pali chu ṭum khatah a kawl khawm vek mek a; Fred Perry, Budge, Laver, Roy Emerson, Andre Agassi, Roger Federer leh Rafael Nadal te angin major tournament-a champion kim thei palyer pariatna chiah a ni.

Mahse, Rod Laver-a'n season khat chhunga Australian Open, French Open, Wimbledon leh US Open a champion kim vek chu a la tluk lo thung. Nikum khan French Open-ah hian a champion lo a, kuminah erawh a champion tak avang hian Wimbledon leh US Open-ah a champion zui thei a nih chuan Laver record nihrual theihna hun a nei dawn.

Hun ropui bik a tawn thu sawiin Djokovic chuan, "Hun lawmawm leh hlimawm danglam bik a ni a, ka career-ah chuan ka hun tawn ropui ber a ni! Roland Garros-ah hian tun hma lama ka la tawn ngaih loh chu ka tawng ve ta. Helai hmuna min ṭan tute chungah lawmthu ka sawi a, Murray hian theihna sang tak a neih avangin nakinah atan hlawhtlinna a la thlen belh ve zel ka beisei," tiin a sawi.

Kuminah hian Djokovic-a tan hian Rafael Nadal leh Andre Agassi te anga 'Career Golden Slam' neihna hun a awm dawn. Kum 1996 Olympic khan Agassi chuan gold medal a lo la tawh a, Nadal hian 2008 Olympic khan gold medal a lo la tawh bawk, player ropui pahnihte hi Grand Slam paliah an champion kim ve ve bawk avangin mi ropui bik an ni.

Grand Slam vawi 14 champion Nadal leh vawi riat champion Agassi te record tluk tur chuan Djokovic hian August thla a neih tur Rio Olympic-ah gold medal a dawn ve a ṭul ang.

Federer leh Nadal te kum a tam tawhin beisei an phak tawh lo a, amah hnaih bertu Murray a ngam viau bawk avangin Djokovic hi a la ropui dawn chauh niin a lang. Player ropui leh ṭha bik a hmachhawnin a zam lo a, inringtawk tak chungin a ding nghet ṭhin. A khingpuite chak lohna lai a hrechiang ṭhinin nawr leh inven hun a hre bawk. Serbian tlangval nungchang dangdai ve tak hian tennis chanchinah bungthar a kai chhunzawm zel a nih pawhin a mak lo ang.

Murray tan a na

Grand Slam final vawi 10 khelh a, a chak lo zawka ṭum riat ngawt ṭan chu a na hle ang - hei hi Murray a dinhmun a ni. Player tharum ngah leh ball vaw na ve tak ni mah se Murray hi a vannei tawk lo a, Wimbledon (2013) leh US Open (2012)-ah te champion ve tawh bawk mah se a theihna en chuan hetiang aia tam nomawi chawi hi a phu.

French Open inbuatsaih nana an hman ṭhin Italian Open final-ah khan Murray hian Djokovic hi a hneh a, kum dang ang lo takin clay court-ah beiseina a nei sang ve hle. Paris-a final khelhah pawh hian set hmasa ber chu harsa lo takin a la mai a, mahse a hnu lamah erawh ama service ngeiah pawh dinhmun ṭha lo zawkah a ding zui fo a, a ṭang zo lo.

Murray hian beisei angin Roland Garros-ah hian bul a ṭan ṭha lo a, a match hmasa pahnihah set nga a khel ve ve. Final thleng hian darkar 20 chuang court chhungah hun a hmang a, final-ah inkhel hautak a hmchhawn zui leh tak bawk avangin a taksain a tlin lo ta niin a lang.

Lawmpuina thu sawiin Murray chuan, "Ka chak lo hi ka la na lo a, a chhan chu tennis khawvela thil thleng ropui bik a thlen huna tel ve theia ka awm avang hian ka lawm. Novak ka lawmpui a, tun hnai thla 12 chhunga a hnathawh hi a ropui hle. Rilru leh taksa a hah hle a, Wimbledon inbuatsaihna ka neih leh hmain chawlh hahdam phawt ka mamawh," tiin a sawi.