Mizoramin hna a thawh ṭhat vangin Sorkar laipuiin a ngaihven: CM Hawla

Chief minister Lal Thanhawla chuan, India rama state tê zingah Mizoram chu hna thawk ṭha ber pawl a nih avangin sorkar laipui pawhin a ngaihven hle niin a sawi.

Serchhip Khawtetlanga tourist lodge chei ṭhat leh tourist cottage sak thar pathum a hawnnaah thu sawiin Chief Minister chuan, "Mizoram hi state tête zingah a ti ṭha pawl a ni a, sorkar laipui pawhin an rawn ngaihven hle. Sorkar programme leh malsawmna kan dawnte hi lawm nachang hria a, Pathian chawimawina atan kan hman thiam a ṭul," a ti.

Lal Thanhawla chuan, tun hnaiah Look East Policy tihhlawhtlin nan Sittwe chhuahká chak taka buatsaihna atan sorkarin Myanmar sorkar chu ṭanpuina sum a pe tih sawiin, "Kuttlingloa sum lak pawisa loin Mizoram chinah heng hna hi an tiṭhuanawpin an tisukuk a ni," a ti a; kuttlingloa sum lâk hreh lote avangin Bairabi-Sairang rel kawng sial mek pawh a hun taka peih loh a hlauh-thawnawm thu a sawi.

Hmun hrang hranga Mizoram House-ah a thleng tur bituk leh pawisa chawi tur bituk a awm tih sawiin, "Tourist lodge-ahte chuan thleng tur bituk a awm lo a, VIP leh VIP lo a awm lo. A duh apiang leh a mamawh apiangte thlenna atana ruahman a ni a, fai leh thianghlim taka hman chu a thlengte mawh a ni," a ti.

Mizoram House hman dan chungchang sawiin Chief Minister chuan, "Sorkarin ṭanpui ngaite ṭanpui turin leh damlote a ngaihsak avangin veivahna tur motor-te leh nurse-te a dah ṭhin," a ti a; damlo bik tana dah hmangsual an awm ṭhin chu pawi a tih thu a sawi.

Tourism minister John Rotluangliana pawhin thu sawiin, tourist lodge-te chu official tan chauh thlenna tur a ni tih ngaihdan awm ṭhin chu a dik lo tih a sawi a, "Tourist lodge hi mipuite ta, mipuite tana awm a ni tih kan hriat a ṭul. Ram chhunga thil ṭha awm hi mipuite ta a nih angin, thinlung taka neitu rilru pú a, duat taka enkawl leh vawnhim a pawimawh," a ti.

Serchhipa tourist lodge building chei ṭhatna leh cottage sakna atan hian June 30, 2012 khan Rs. 1,72,00,000 hmuh a ni a; June 2013-ah hnathawh ṭan niin, October 2014-ah zawh a ni.

Tourist lodge chei ṭhat hi chhawng hnih niin, khualzin thlenna room pasarih, suite room pathum, dormitory pakhat, dining room pakhat, office pakhat, lounge pakhat, caretaker room pakhat leh store room pahnih a awm.

Chief Minister hian nimin vek khan Rs. 1,92,288 senga Mizoram Upa Pawl (MUP) Sub-Hqrs. Serchhipin Serchhip Bazar tuala office an siam thar a hawng.