NBA Finals Game 3 Cleveland an tho leh thei ang em?
LeBron James leh a team Cleveland Cavaliers tan NBA champion nomawi chawi tur chuan hna hautak tak thawh a ngai tawh dawn. Ningani zing dar 6:30 hian Finals Game 3 khel turin champion lai Golden State Warriors an lo mikhual ang.
Eastern Conference cham-pion Cleveland hian nikuma an hneh loh tawh Western Conference champion lakah phuba lak let ngei tum mah se Finals game hnih an khelh tawhah (89-104) leh (77-110) in a chak lo zawkah an ṭang ve ve a, mahse an inkhelhna hi Golden State khelmual Oracle Arena, Oakland a ni thung.
NBA Finel Game 3 leh 4 hi Cleveland khelmual Quicken Loans Arena-ah khelh a ni dawn a, hei hi mikhual tana inkhelh harsatna hmun a ni. Cavs hian an khelmualah hian kumin playoff-ah hneh loh an tawng lo a, regular season-ah pawh vawi 33 hnehna changin ṭum riat chiah an chak lo, hei hi an inrintawkna tur leh innghahna tur chhan ṭha chu a ni.
Finals game hnih an khelh tawh aṭangin NBA Most Va-luable Player Awards vawi li dawng tawhtu James a che ṭha tawk lo a, game 2 bikah Cleve-land-in turnover vawi 17 an neih zinga ṭum sarih zet chu American power forward James a neih a ni. Kum 31-a upa James hian point 19 a score bakah rebound vawi riat laiin assists ṭum kua a nei bawk a, Cavs tana an thiampuipa hnathawh hi Golden State hneh nan a tawk zawh loh avangin James hian tun hma lama a lo tih fo tawh 'thilmak' kha a la ti thei a nih chuan a thlentir leh a hun tawh hle.
Cleveland coach Tyronn Lue chuan, "Golden State hi kan hlau lo a, ṭha taka kan khelh chhuah theih tawh ngei ka ring. Kan theihna leh thiamna sang tak kan lan-chhuahtir ṭha thei lo hi a mak ka ti a, inkhel boruak sang tak pawh nise buai tur chu kan ni tawh lo. Ka player-ten tihsual an nei fo a, kan insiamṭhat a hun tawh takzet," tiin a sawi.
Warriors hi an khelh ṭhat vanglai a ni a, star player Stephen Curry leh Klay Thompson ten duhthusamin khel chhuak rih lo mah se Draymond Green, Shaun Livingston leh Andrew Bogut te an chet fuh rih miau avangin rinkai zawk an ni.
Steph Curry-a'n Olympic khel dawn lo
NBA most valuable player nilai Stephen Curry chuan August thla a neih tur Rio Olympic-ah United States of America (USA) tana inlan a tum loh thu a sawi.
Kum 28-a upa Curry hian regular season-ah a Golden State Warriors chu vawi 73 zet hnehna chanpuiin NBA chanchina a vawi khat nan chuhbuaitu nei loa MVP atana thlan hmasak ber a ni, Warriors hi NBA Finals hruai thleng lehin Game 2-ah point 18 a score hmangin hnehna a chanpui leh tawh a, a vanglai hun a hmang mek.
Point guard Curry chuan, "Tun nipui chhunga ka thil tum pakhat chu ka taksa enkawl ṭhat leh 2016-17 NBA season lo thleng tur atana inbuatsaih a ni," tiin a sawi.
Olympic a khelh loh tur thu sawi chhunzawmin Curry chuan, "USA Basketball team tan khelh phak hi chawimawina ropui a nih bakah tawnhriat tam tak neihna a ni a, ram tana khel lo tura thuthukna siam hi a harsa hle. Mahse, tun hnaiah ka kerek leh khupah hliam ka tawk a, ka hma hun ngaihtuahin Olympic khel loh hi ka tan a ṭha ber turah kan ngai," a ti.
American thlangval Curry hian regular season-ah khan three point vawi 402 tehmeuh mai a vawm lut a, tun hmain vawi 400 nei tling thei hi an la awm ngai lo hrim hrim.
Team USA coach Mike Krzyzewski chuan a player 12 thlanchhuah hming chu June thla tawp lam hian a puang chhuak tur a ngaih a ni. US hian Olympic mipa basketball inelna an thunun hneh hle a, tun hnai Olympic vawi rukah ṭum nga ngawt an champion a ni.