Euro 2016 khelhna tur stadium

European Championship 2016 chu France ramin a thleng dawn a, match 51 khelh tur awmin khawpui 10-ah khelh a ni ang. Tun ṭum hi France-in vawi thum Euroa thlenna tur chiah a ni a, inelna ṭan kum 1960 leh kum 1984 te khan a lo thleng tawh a ni. Euro 2016 champion hi Russia ram thlen tur 2017 FIFA Confederations Cup khel turin an tling ang.

Euro 2016 thleng tur hian France hi Turkey leh Italy te nen an inel a, thlen kawp tum Norway leh Sweden te chu vote thlak hmain an inhnukdawk. May 28, 2010 khan France chu inelna thleng tura tihchian an ni.

France-in Euro 2016 thlen an tum ṭantirh hian stadium 12 an chhawp chhuak a, French Football Federation chuan stadium hman zat hi pakuaah tih tlem an tum. France national stadium Stade de France, stadium thar pali Lille, Lyon, Nice leh Bordeaux bakah khawpui lian Paris leh Marseille te chu thlan nghal an ni. Strasbourg chu sum lam harsatna vangin an inhnukdawk a, khawpui dang pahnih thlan turah Saint-Étienne leh Toulouse aiah Lens leh Nancy te chu thlan an ni.

Team 16 inelna ni ṭhin chu team 24-ah tihpun a nih avangin stadium 11 hman tum a ni a, hei vang hian Saint-Étienne leh Toulouse te pawh thleng tur zinga dah tel an ni leh. December 2011-ah Nancy an inhnuk-dawk a, Euro 2016 thleng tur khawpui zat chu 10 a ni chiah bawk.

UEFA Executive Committee chuan January 25, 2013 khan inelna neihna tur stadium chu an ti chiang a, 1998 FIFA World Cup khelhna hmun Stade de la Beaujoire (Nantes) leh Stade de la Mosson (Montpellier) te a tel ve lo.

Stade de France : 1998 FIFA World Cup ṭan hmaa sak a ni a, France national team-in home match khelhna atan an hmang. He stadium hian rugby, athletics, motorsport leh concert te pawh a thleng tawh ṭhin a, 1998 FIFA World Cup final-a France-in Brazil 3-0 a an hnehna hmun kha a ni. Tun ṭumah pawh hian final khelhna tur a ni dawn a, group match pali bakah last 16 leh quarterfinal match khat ve ve a thleng bawk ang.

Stade Velodrome : Euro maktaduai 267 sen belhin Stade Velodrome hi chei ṭhat a ni a, September 2014 khan zawh niin October thlaa hawnna hunah Marseille leh Torino FC te an inkhel. 1938 leh 1998 FIFA World Cup te a lo thleng tawh a, tun ṭumah hian group match pali bakah quarterfinal leh semifinal match khat ve ve a thleng ang.

Stade de Lyon : Olympique Lyonnais khelmual thar hi kumin January khan hawn a ni a, stadium chhehvelah hian Lyon training ground bakah hotel leh office building te a awm. Tun ṭumah hian group match pali, last 16 leh semifinal a thleng ang.

Stade Pierre-Mauroy : August 2012 khan hawn a ni a, stadium chung nei niin a hawn theih bawk. LOSC Lille-in home match khelhna atana an hman khelmualah hian group match pali bakah last 16 leh quarterfinal khelh a ni ang.

Parc des Princes : Paris Saint-Germain FC khelmual a nih avangin a lar a, helai hmuna stadium ṭum thum an sakna a ni. An stadium sak hmasak ber chu 1897 daih tawh niin kum 1932-ah a vawi hnih nan an hawng a, tun ṭuma hman tur hi May 1972 a ni. Euro 2016 atan hian cheiṭhat a ni a, 2015 khan zawh fel a ni. Parc des Princes-ah hian group match pali leh last 16 match khat khelh a ni ang.

Stade de Bordeaux : Kum 2013 khan sak ṭan a ni a, pound maktaduai 184 senga sak Stade de Bordeaux hi thla 26 hnuah zawh a ni. Euro 2016-ah hian group match pali bakah quarterfinal match khat a thleng ang.

Stade Geoffroy Guichard : Kum 1931 daih tawh khan Stade Geoffroy Guichard hi hawn a ni. 1984 Euro, 1998 FIFA World Cup leh 2007 Rugby World Cup te kha helai hmunah hian khelh a lo ni tawh a, tun ṭum atan hian cheiṭhat niin 2014 kum tawp lam khan zawh a ni. Euro 2016-ah group match pathum leh last 16 pakhat a thleng ang.

Stade de Nice : September 2013-a hawn stadium hi an chhuanna em em chu eco-friendly a nihna hi a ni a, he stadium tuam nan hian solar panel 4,000 chuang hman niin kawlphetha a mamawh zat let thum a pe chhuak. Hei chauh hi a ni lo a, khelmualin a mamawh tui chu ruahtui aṭangin khawl a ni bawk. Nice khelmualah hian group match pathum leh last 16 match khat khelh a ni ang.

Stade Bollaert-Delelis : UEFA Euro 2016 pual hian sak ṭhat a ni a, August 2015-ah hawn a ni. Stadium awmna khua Lens hi Euro 2016 thlenna khua zinga te ber a ni a, khaw mipui hi an vai deuh thoin Ligue 2 club Lens khelmualah hian khung theih an ni ang. He hmunah hian group match pathum leh last 16 match khat khelh a ni ang.

Stadium de Toulouse  : 1938 FIFA World Cup khelhna tur a sak niin rugby khelh nan hman a ni ṭhin bawk. 1998 FIFA World Cup khelh nan pawh khan hman a lo ni tawh a, tun ṭum atan hian cheiṭhat niin kumin kumtir khan hawn a ni. Toulouse FC khelmualah hian group match pathum leh last 16 match khat khelh a ni ang.