Copa America Cenetenario Brazil hmaah Haiti, Dunga naute tan chak a pawimawh

Khawvela tlarhma nei hlauh-awm ber ang hiala sawi
ṭhin Brazil-in Copa America-a an match hmasa berah goal khung loin Ecuador an inhnehtawkpui a, naktuk zing dar 5:00-ah Haiti an hmachhawn leh dawn - Dunga naute hian chak result an hlawh chhuak zo lo a nih chuan dem an hlawh tawh dawn.

Naktuk zing dar 7:30-ah an match hmasa bera Haiti hnehtu Peru chuan Ecuador an hmachhawn dawn bawk a, Peru tan an chak leh a nih chuan last 16 kalkawng a awlsam sawt tawh dawn tihna a ni - Brazil laka point hnih hlohtu Ecuador tan an beiseina chhi nung turin chak loh a thiang lo bawk.

Vannei Brazil

Ecuador nen an inhma-chhawn ṭumin Brazil an vannei a, Miller Bolanos goal hmanga chak thei Ecuador goal referee-in sawisel theih taka a pawm sak loh avangin nasa zawka mualphona lakah Brazil an him - zaninah dinhmun hlauhawma an din a thiang tawh lo.

Team pahnih hi tun hma-in vawi khat chiah an la in-hmachhawn a, an inhma-chhawn ṭum hi kum 1959 kha niin 9-1 teh meuhin Brazli an chak. Zaninah thawnthu danglam vak a thlen rin a ni lo a, Selecao hi chak tura beisei zawk an ni. Mahse, Brazil-in Ecuador an hmachhawn hma khan chak tura beisei zawk an ni tho a, goal khung loin hun tawp thleng an hmang.

Mohun Bagan winger Sony Norde telna Haiti-in Peru an hmachhawn ṭumin beisei an phak lo a, an chak lohna hi 1-0 lek nimahse inkhelh chhung zawngin Peru-in inkhel an thunun. Zaninah insiamṭhat an tum dawn a, Brazil laka insiamṭhat tum hi hna hautak a ni ang.

Brazil-in an match hnu-hnung pangaah tlawm hmel hmu lo mah se heng zinga match hnihah chiah hian an chak a, match thum dangah an khingpuite an inhnehtawkpui thung.

Haiti-in an match hnuhnung pangaah hneh an nei lo thung a, vawi li a tlawm zawkah
ṭangin vawi khat an khingpui an inhnehtawkpui - Brazil-in he team hi an hneh zo lo a nih chuan Dunga hmalam hunin a tawrh ngei a rinawm.

Ecuador vs Peru

Ram pahnih hi football ram ropuia sawi ni ngai lo mah se player ṭha tak tak an kawl avangin naktuk zing an inkhel tur hi a hmuhnawm dawn - team inngam tawk tak ni tura beisei an ni.

Ecuador-in an match hnu-hnung pangaah vawi khat chiah chak hmel an hmu a, vawi hnih a tlawm zawkah ṭangin vawi hnih an khingpui an inhnehtawkpui - mah se, he team hi an match hnuhnung bera Brazil chhaih buai theitu an nih avangin Peru tan awlsam taka hneh theih beisei chi an ni lo.

Peru-in an match hnuhnung pangaah vawi thum hnehna changin vawi khat a tlawm zawkah an ṭang a, vawi khat an khingpui an inhnehtawkpui - an match hnuhnung pa-thumah an chak avangin phurna nasa tak nen Ecuador an hmachhawn ang.

Team pahnih an lo inhma-chhawn tawh vawi 13-ah erawh Ecuador an chungnung zawk. Vawi kua a chak zawkah ṭangin vawi li an inhnehtawk a, Peru-in vawi hnih chiah hnehna an chang ve thung.