Lewandowski a chhuak dawn lo

Bayern Munich technical director Michael Reschke chuan tun hnaia Real Madrid nena sawizawm hlawh mek an striker pawimawh Robert Lewandowski chuan Allianz Arena a chhuahsan loh tur thu a sawi.

Poland international hmalam hun hi khawthlang media-te titi tui ber a ni leh tawh a, ṭhenkhat chuan Euro 2016 zawha Real Madrid zawm tur ang hialin an ziak hman.

Mahse, Reschke chuan, "Le-wan-dowski hian season tharah pawh Bayern tan a khel leh ang, hei hi chu thudik awmsa a ni. Kan club tana khel turin kum thum chhung contract a la nei a, khawvela striker ṭha ber pawl kan kawl tih kan hriat bawk avangin kan chhuah lo ang," a ti.

Lewandowski-a'n Bayern a chhuahsan chuan a thlak turin Gonzalo Higuain-a'n Allianz Arena a pan dawn nia sawi a ni a, mah se Reschke chuan hei pawh hi a pha.

Bayern technical director chuan, "Gonzalo Higuain hi khawvela striker ṭha zual pathum emaw pali zinga lang phak a ni. Mahse, khawvela striker ṭha ber kan neih avangin ani lakluh hi kan tan a
ṭulna a awm lo," a ti.

Euro 2016-a Poland captain tur Lewandowski hian season hman zawh takah khan Bayern tan inelna hrang hrangah match 51 khelin goal 42 a khung a, season duhawm tak a hmang.