Inter Milan-ah Chinese sumdawng hausa

Chinese investor Suning Commerce Group Co Ltd. chuan Italian club lian Inter Milan-ah neitu nihna 70% bawr vel an lei a, Chinese Super League club Jiangsu Suning neitute hian Inter-a neitu nihna 70% nei tur hian pound maktaduai 212 an seng.

Inter Milan-a share nei hnem ber chu Erick Thohir niin 70% a nei a, Inter president hlui Massimo Moratti chuan 30% a nei bawk. Thohir hian a neitu nihna 40% vel chu Suning Commerce Group Co Ltd. hnenah hian a hralh a, Moratti hian a share neih zawng zawng 30% a hralh thung.

Suning Group chairman Zhang Jidong chuan, "Khawvel huapa inzarpharh tum kan ni a, Europe-ah hian lian takin kan la ding thuai ang. Khawvel leh Europe-a club lian ber pawl nen kan thawk ho dawn ta a, China-ah nasa takin football a lo ṭhang ve zel bawk nen kan tan chuan Inter-a share neih hi hlawkna hlir a ni,"a ti.

Inter Milan president nilai Erick Thohir chuan Italian club-ah hian president dinhmun a chelh chhunzawm zel rih dawn a, vice-president Javier Zanetti chu Jiangsu-a inbiakna neihnaa Inter aiawha kal zingah a tel bawk.