Serena a hausa ber

French Open final-a Garbine Muguruza a hneh loh hnuah Serena Williams chuan chanchin lawmawm a nei. American chanchinbu lar Forbes-in a tarlan dan chuan khawvela hmeichhe infiammi zingah tennis khelthiam hmingthang Serena hian nikum chhung khan sum a hailut hnem ber.

World number 1 hlui Maria Sharapova chuan tun hnai kum 11 chungin hmeichhe infiammi zinga sum lalut hnem ber nihna hi a hauh char char ṭhin a, mahse Russian star hian damdawi hman phal loh a hmang tih kumin kumtir lam khan hriatchhuah a nih avangin sumdawnna lama a kawppui company lian ten an kalsan a, a sum lakluh a hniam phah hle.

American star Serena hi kum 2002 kha chuan Grand Slam pahnihah chiah a la champion a, hemi hnu hian majour tournament-ah hian ṭum 19 zet a champion belh leh tawh a, tun hnai thla 12 chhunga a sum lakluh chu US dollar maktaduai 28.9 a ni. Grand Slam vawi nga champion tawh Sharapova chuan pahnihna dinhmun la luahin US dollar maktaduai 21.9 a la lut a, nikuma a hausakna chu dollar maktaduai 8 vel laiin a phak ta lo a ni.

American UFC star Ronda Rousey chuan dollar maktaduai 14 lalutin pathumna dinhmun a luah a, dollar maktaduai 13.9 laluttu NASCAR stock car driver Danica Patrick chu palina a ni bawk.