Dortmund-ah Bayern midfielder Rode

Borussia Dortmund chuan Manchester City laka an midfielder pawimawh Ilkay Gun-dogan an chan hnuah a hmun ruak luah turin Bayern Munich midfielder Sebastian Rode an la lut. Kum 25-a upa midfielder hian Signal Iduna Park-ah hian kum li cham turin contract a ziak a, a man zat erawh puanzar a ni lo.

Season hman zawh taka Bayern tana match 17 chiah kheltu midfielder chuan, "Ka naupan lai aṭangin Dortmund hi ka lo ṭan tawh ṭhin a, ka club ngainat tana ka khel thei tur hi ka lawm hle a ni. Thomas Tuchel hi coach ṭha tak a ni a, a en-kawlna hnuaiah Signal Iduna Park-a ka match hma-sa ber khelh hlan ka nghak-hlel takzet a ni," a ti.

Bayern chief executive Karl-Heinz Rummenigge chuan, "Sebastian Rode hian Dortmund-ah hmun a chan tam theih zawk beiseiin chhuah min dil a, min dilna ang hian rem kan tihsak ta a ni," tiin an midfielder an chhuah tir chhan a sawi.

Sebastian Rode hian kum 2014 khan Eintracht Frankfurt aṭangin Bayern hi free transfer-in a zawm a, German champion tan hian season hnih chhungin match 52 a khel a, goal li a khung.