Argentina-in Chile lakah phuba an la

2015 Copa America final rematch chu nimin zing khan Levi’s Stadium-ah khelh a ni a, Angel di Maria leh Ever Banega te goal hmangin Argentina-in Chile 2-1 in an hneh. Group D inkhel dangah Panama-in Blas Perez-a goal hnih khung hmangin Bolivia 2-1 in an hneh ve bawk.

Messi tel loin

Rin lawk ang ngeiin Lio-nel Messi chu squad-ah tel mah se entu bak a ni lo a, Albiceleste (Argentina sawina)-in tlarhmaah player an neih
ṭhat em avangin talent nei
ṭha bik Messi awm loh a lang lo. Barcelona forward bulah hian Ezequiel Lavezzi, Javier Pastore, Sergio Aguero leh Erik Lamela te an ṭhu a, Argentina hian inkhel thlak danglam thei tur player an ngah hle.

Argentina manager Gerardo Martino-a'n Angel Di Maria, Gonzalo Higuain leh Ever Banega te chu starting eleven-ah a dah a, Messi aia lut Nicolas Gaitan nen ṭan phat aṭangin Chile tlarhnung tan harsatna an siam nghal. Mipuiin Messi hmu châkin a hming an lam a, an auh chhuah zo loh bakah Argentina-in an mamawh lo.

A pi tan

First half-ah goal a lut lo a, Chile chetsual vangin mi-nute 54-naah Argentina-in an chhu let a, Banega pass chu Di Maria-a'n goal-ah a chantir - Barcelona keeper Claudio Bravo-a'n a hna a tlin tawk lo.

PSG winger Di Maria hi inkhelh hmain a piin a thihsan a, inkhelh a ṭhulh phah lo. Manchester United winger hlui hian goal a khung zawhah 'Ka pi, ka va ngai dawn che em' tih inziahna kawr chu khawvel mipui hmuh theih turin a pholang.

Minute nga hnuah Banega-a'n Argentina goal hnihna a khung a, Di Maria ball pek ni thungin goal hmasa nen inang tak ni mah se Chile defender Isla-a'n ball a tlawh kawi zeuh avangin keeper dem theih a ni tawh lo thung.

Goal khat!

Argentina-in hun tawp lamah Premier League star Sergio Aguero leh Erik Lamela te an luhtir a, goal khungtu zawk erawh Chile an ni. Argentina keeper Sergio Romero-a'n freekick aṭanga ball kal dan a chhutsual avangin substitute Jose Fuenzalida-a'n Copa America champion lai tan a khung a, goal dang khung belh nan a tlai hret tawh.

Chile-in Arturo Vidal leh Alexis Sanchez te an neih avangin Argentina an fimkhur a, an tifuh bawk. Tata Martino hoten hun tawpa goal an chhuah tih loh chu Chile tlarhma an dang ṭha viau a, Barcelona defender Javier Mascherano chu midfield-ah la ṭangkai hle.

Copa America final re-match-ah Argentina hi chiang taka chak angin lang mah se Chile hian anmahni tihsual vanga chak lo tih an hai lo ang.

Eng nge an sawi?

Chile coach Juan Antonio Pizzi chuan, "Kan team leh kan theihna hi ka ring tawk a, kan tlukna aṭang hian chak chho turin kan tho leh ang. Kan tihsual tih loah chuan team pahnih inkarah danglamna ka hmu lo. Kan hmabakah match khelh tur harsa tak kan la hmachhawn dawn a, chutichung chuan quarterfinal kan thlen theih hi ka ring hle," tiin an sawi.

Argentina coach Gerardo Martino chuan, "Messi tel lo pawhin kan ṭha a, awm se chuan kan ṭha lehzual ang. Tunah chuan ball a pet ṭha leh thei tawh a, ni li hnuah chuan ngai a awh tawh ang. Min telpui chho theih a nih chuan Copa America kan champion theihna chance hi a sang sawt a dawn a ni," tiin captain chungchang a sawi a, an chak chu player zawng zawng khelh ṭhat vang a nih thu a sawi bawk.

Inkhel dang

Orlando, Fla-a ruahsur hnuaia inkhelah Panama tan MLS club Vancouver Whitecaps forward Blas Perez-a'n minute 11-na lekah hmahruaina goal a khung. Bolivia-in minute 35-naah Juan Arce hmangin sut mah se kum 35-a upa forward Perez hian minute 87-naah chakna goal a khung.