Italy an inbuatsaih ṭha

Thawhṭanni zan khan Italy chuan Euro 2016 khelh hmaa an match hnuhnung ber an khel a, Antonio Candreva (71') leh Daniele De Rossi (71')-te goal khung hmangin Finland 2-0 in an hneh.

Italy coach Antonio Conte-a'n a player chhawr rim loh zingah goalkeeper Salvatore Sirigu, forward pahnih Simone Zaza leh Ciro Immobile-te Euro ṭan hmaa an ṭhatna pholang turin hun ṭha a pe a, goal khung lo mah se Juventus forward Simone Zaza chu khelmualah player langsar a ni.

Euro zawh ruala Chel-sea pan tur Italy coach Antonio Conte chuan, "Theihtawp chhuahin kan bei reng a, hmasawnna hmuh tur a awm zel ang. Goal-ah vawi tam tak shot kan nei a, vanneihna kan lamah a ṭang lo zawk a ni. Euro 2016 chu tun ai hian a harsa zawk dawn tih ka hria a, mah se theihtawp chhuahin kan khel ang," tiin France-a an inkhel tur a thlir lawk.

Italy-in June 13 zanah Euro 2016-a an match hmasa ber an khel dawn a, champion beisei ngam zinga mi Belgium an hmachhawn ang.