MPL champion Aizawl FC an che ṭan

Aizawl FC-in Mizoram Premier League season hnih chhung a zawna an champion-na kawnga defender pawimawh Lalramchullova'n nimin khan a contract neih lai a ziah belh a, Armed Veng tlangval hma hian defender pahnih Lalṭhakima leh Jonathan Lalhriatkima te'n an contract neih lai an lo pawtsei tawh bawk.

Luangmual FC aṭanga Aizawl FC zawmtu Chullova hi I League match khatah chiah a inlan lo a, East Bengal an hneh loh ṭuma hnawhchhuah a nih avangin Mohun Bagan an hneh ṭumah a inlan lo. Chullova hi khelmual chhunga a chetṭhat avangin ram pawn lam media-in a chanchin ziah nuam an ti a, contract pawtsei mah se tun thlengin ISL club a zawm ang em tih hi zawhna chhan har tak a la ni reng.

Federation Cup pahnihna AFC president Robert Romawia Royte chuan season tawpa an hlawhtlinnaa an lawmnaah MPL a zawna vawi thum chawi chu a bat a nih thu a lo sawi tawh a, technical director Hmingthansanga bulah champion squad din tura a hrilh tawh thu a sawi bawk.

MPL champion hian squad an nei chhah a, chuvangin an hna hmasa ber chu player dang lak hmain an neih sa chelh a ni. AFC-in senior player pathum contract an ziah belh bakah academy player pali Lalawmpuia Hnamte (central midfielder), Vanlalṭhazuala (central midfielder), Lalramhmunmawia (wing back) leh Jonathan Lalrawng-bawla (forward) te chu contract puitling an ziah pui bawk.

Amaherawhchu AFC hian elpui Chanmari FC lakah midfielder ṭha R. Malsawmtluanga an chan a, coach thar Lalsangzuala Hmar hnuaia khel tur CFC hian Mizo zinga I League khel hmasa ber AFC chunga awm hi an tum ber niin a lang. MPL5 club thar Chhinga Vengin thawm an nei lian a, Bethlehem VT FC-in coach thar an nei bawk a, season ṭan hma hauhin tualchhung football a ngaihnawm ṭan e.