Mourinho beisei Mexican rawlthar

Mexican club Pachuca vice-president Andres Fassi chuan an rawlthar winger Hirving Lozano chu Old Trafford lamah Manchester United boss thar Jose Mourinho-a'n lakluh tuma a dawr thu a sawi.

Kum 20 leka upa Mexican rawlthar duhawm hian season hman zawh takah khan Pachuca tan inelna hrang hrangah match 65 khelin goal 15 a khung a, Copa America Centenario khel mek Mexico squad-ah telh a ni.

Pachuca vice-president Andres Fassi chuan an winger hi Manchester United-in lakluh tuma an dawr thu pha buai loin, "Manchester United hian Lozano lakluh tumin min dawr ngei a ni. Europe-a club hrang hrangin Lozano hi lakluh an duh a, a contract neih laiah hian Europe club-in an dawr a nih chuan a chhuah theih dan tur kan ziak a ni," tiin an rawlthar duhawm chu an chelh a ring lo.

Hirving Lozano hi Copa America-a an match hmasa bera Uruguay 3-1 a an hneh ṭumin bench aṭangin a tlan lut a, Mexico tan vawi thum a inlanah goal khat a khung tawh.

CONCACAF U-20 Cham-pionship 2015-ah goal khung hnem ber niin Golden Boot a dawng a, hemi kum vek hian CONCACAF Men's Olympic Qualifying Cham-pionship-ah player thiam berah thlan a ni bawk.