Ali kuang zawn tur Lennox Lewis

Boxer piang tawh zinga ropui ber ang hiala sawi Muhammad Ali chu kar hmasa Zirtawpni khan 'nerve' lam natna chi khat Parkinson's disease vangin kum 74-a upa niin a thi a, Zirtawpni khian vawi thum heavyweight world champion lo ni tawh boxer hi vui liam a ni dawn.

Ali-a chawr chhuahna Louisville, Kentucky-a vuina hun neih turah boxer ropui kuang zawntu tur puan a ni a, heng zingah hian boxing world heavyweight champion hlui Lennox Lewis a tel. Kum 50-a upa Lewis hian kum 1999 khan WBC, WBA, IBF leh IBO heavy-weight title a lo kawl vek tawh a, a hunlaia boxer ropui ber pawl niin boxer a lo tukdawl tawh zingah Evander Holyfield, Mike Tyson leh Vitali Klits-chko-te an langsar hle.

Muhammad Ali-a kuang zawn tur zingah kum 2001-a boxer ropui chanchin behchhana film siam 'Ali' changtu Will Smith, Ali nena training dun ṭhin boxer kum 2014-a thi Jimmy Ellis-a unaupa Jerry Ellis, Ali-a cousin John Grady leh Jan Wadell, a vah Ibn Ali, chhungkaw ṭhian Komawi Ali leh John Ramsey te chu telh an ni.