Roger Federer a dam

World number 3 Roger Federer chu harsatna lian tham nei loin a inkhel leh thei tawh a, Wimbledon inpuahchahna tournament pakhat tunkar chhunga khelh tur 2016 Mercedes Cup-ah inlan a tum.

Swiss thiampuipa Federer hi Grand Slam tournament a zawna vawi 65 zet a khelh hnuah hnung-zâng na vangin French Open-ah a inlan lo.

Wimbledon vawi sarih champion tawh Federer chuan, "Kar thum chhung ka hahchawl tawh a, enkawlna ṭha ka dawn bawk avangin tunah chuan ka taksa pawh inkhel turin a inpeih ve leh ta," tiin a inkhelh thiam-na hmun grass court tournament khel tura a inpeih thu a sawi.

Grand Slam vawi 17 champion tawh Federer hi kuminah hliam vangin a buai ve fo a, Australian Open semifinal-a world number 1 Novak Djokovic a hneh loh hnu khan a khup zai a ngai nghe nghe.

Hun harsa a tawn thu sawiin Federer chuan, "Ka tan chuan kum harsa leh hautak tak chu a ni ve, mahse tunah chuan ka ṭha leh tawh a, buaina ka tawh tawh loh hram ka beisei. Kumin mai bakah ka hun lokal lehzel turah pawh ṭha taka ka inkhelh chhunzawm theih nan hun ṭha ka neih theih ve leh ka beisei. Ka taksa enkawl dam ṭha tura chawlh ka nei kha ka tih fuh hlein ka hria," tiin a sawi bawk.

Kum 34-a upa Federer hi a kum tam deuh tawh mah se khawvela player ṭha berte zinga mi a la ni a, tun hnai kum hnih chhung khan Wimbledon final a lut ve ve a, Serbian thiampuipa Djokovic lakah a vanduai thung.