Goal khungtu naupang ber Arda Guler

Arda Guler chuan Cristiano Ronald-a'n record a lo siam tawh chu khumin European Championship huanga goal khung thei naupang ber a ni, an ram Turkey chu Georgia lakah 3-1 in a chakpui.

Thawhlehni zan Group F inkhelah Turkey tan Guler bakah hian Mert Muldur leh Muhammed Kerem Akturkoglu ten goal an khung a; Georgia goal neih chhun hi Georges Mikautadze khung a ni thung.

Goal a khung zan hian Guler hi kum 19 leh ni 114 mi a ni - Euro 2004 khan Ronaldo chuan kum 19 leh ni 128 mi niin goal a lo khung tawh a, record hi ni 14 in a rawn khum ta a ni.

Guler hi Turkey khawpui Istanbul aṭanga seilian a ni a, kum kua lek a nih avangin Ankara khaw club Gençlerbirliği tan a khel a, ball thunun leh mi bum vel a thiam em avangin 'Turkish Messi' tiin a hming lem an vuahsak.

Kum 2023 khan Real Madrid a zawm a, Spanish club lian tan hian season hmasa khan La Liga match 10 khelin goal ruk a khung a, league champion a nihpui - hma hun êng tak a nei mek a ni.