Goal phurh hnuah Portugal an tho chhuak

Hun tawp dawna Francisco Conceicao-a goal khung hmangin Portugal chuan Czech Republic 2-1 in an lehthal a, goal phur hmasa zet mah se Euro 2024 an match hmasa ber aṭangin point thum an hlawh chhuak.

Roberto Martinez-a enkawl Portugal hian qualifying an match zawng zawngah hnehna an chang vek a, champion tura rinkai pawh an ni. Mahse, Thawhlehni zan inkhelah Czech lamin Lukas Provod hmangin goal an khung hmasa.

Czech Republic an vanduai - Robin Hranac chuan anmahni lamah a tilut palh a, hun tawp hma deuh chiahin Conceicao chuan defender tihsual karah chakna goal a khung zui leh bawk a ni.

Inbuatsaihna an nei ṭha a, captain Cristiano Ronaldo hun hnuhnung lam a ni tawh bawk - Ronaldo hian chawlhlawk hmain goal khung theihna hun ṭha vawi hnih a nei, mahse goalkeeper Jindrich Stanek a paltlang thei lo.

A vawi ruk nana Euro kheltu Ronaldo leh a ṭhianten goal nawr viau mah se a hmawr an bawk thei tlat lo, second half-ah Provod chuan box pawn aṭangin mawi zetin a pet kual lut.

Euro 2016 champion Portugal tan Diogo Jota chuan goal khungah inngai mah se offside vanga hnawlsak a ni a, an tan zan ṭha lo a ni mai dawn ni pawhin a lang hman a, chutihrualin an vanduai reng bik lo.

Nuno Mendes-a ball tauh goalkeeper Jindrich Stanek-a'n an lama lut tur a dan per chu a bul hnaia awm Hranac chuan a lo dang lut palh a, hmanhmawh takin Ronaldo chuan ball la zuiin chakna goal khung ngei an tum.

Portugal coach Martinez-a'n bench aṭanga a dah luh pahnihte a tawpah an inlar - Pedro Neto-a cross chu defender Robin Hranac tan chinfel mai theih niin lang mah se a tisual zauh a, ball per hi Conceicao chuan laklawh nei miah loin a khung.

Hnehna an chan hnuah Portugal coach Matinez chuan, "Match hmasa a ni a, kan tan chuan a awlsam lo khawp mai. Chutihrualin match harsa leh hautak khel turin kan inpeih a, kan puitling tawk a ni tih lanna chu Francisco a chet dan kha a ni," tiin a naute chungah rinna a nghat.

Ngaihnawm:

• Cristiano Ronaldo chu Euro vawi ruk khel thei hmasa ber a ni.

• Pepe chu Euro khel thei upa ber a ni, kum 41 leh ni 113 mi niin a inlan.

• Euro 2024 khelh tawh chinah half time hmaa goal a luh lohna hmasa ber a ni.

• Portugal hian Czech Republic nen an intawn hmnuhnung pangaah hnehna an chang vek.