Charity match ni mah se tlawm zawk nih an duh dawn lo - Jeje

MFA leh Mizo Professional Footballers Association (MPFA) ṭangkawp chuan Cyclone Remal vanga chhiat tawkte ṭanpui nan Charity Match a buatsaih dawn a, ISL leh I League-a Mizo player-te June 21, Zirtawpni hian RG Stadium-ah an inkhel ang.

India international striker hlui Jeje Lalpekhlua chuan, "ISL leh I Legue a nih avangin charity match ni mah se tlawm zawk nih an duh dawn lo. Tuna I League khel eng emaw zat hian season tharah chuan ISL an khel dawn. Team ṭha zawk pawh hriatthiam a har a, inkhel erawh a hmuhnawm khawp ang," tiin Vanglaini a hrilh.

ISL club Chennaiyin FC legend Jeje hi ISL team lamah technical director a ni dawn a, ani hian Mizo player-te a hrechiang hle. Aizawl FC sporting director Hmingthansanga Zadeng chuan, "I League-ah hian Mizo ṭhahnem tak an awm a, Charity match khel tur thlan chhuah pawh a harsa. Team ṭha tak kan chhawp chhuak turah ngai ila, inkhel hmuhnawm a beisei thei ang," tiin a sawi ve bawk.

Hmingthana hian hun rei tak Aizawl FC a enkawl tawh a, Mizo zinga I League inelna hrechiang ber zinga mi a ni. Tun ṭumah hian Hmingthana hi I League team lamah assistant manager atan ruat a ni.

Charity match buatsaih a nih theih nan MPFA an pawimawh a, MPFA hian kum 2010 aṭang khan charity match hi an buatsaih ṭan tawh. Hnahthial leh Lungleiah vawi hnih ve ve an buatsaih tawh a, Champhai, Serchhip, Kolasib Khawzawl leh Saitualah vawi khat ṭheuh an buatsaih tawh bawk.

Tun ṭum hi MFA leh MPFA ṭangkawpa buatsaih a ni a, player-te pawhin an ngai pawimawh hle. ISL leh I League team inkhelh hun hi zan dar 7:30 a ni a, chutihrualin tlai dar 4:00 aṭangin stadium-ah luh theih a ni ang.

Tlai dar 5:00-ah All Star Football match khelh a ni dawn a, kawng hrang hranga Mizo mipui hriat hlawhten an khel dawn. Inkhel zawh hian entertainment programme-in a chhunzawm dawn a, zai leh lam hmangin charity match en tura kalkhawmte ennawm chhawp sak an ni ang.