Sawisel hlawh England inlan hun a thleng leh ta

Major tournament khelh a nih apiangin England hi boruak sang ber pawl an ni ziah a, a tak ram erawh a danglam ṭhin - an champion hnuhnung ber sawi dawn chuan, "Hmanah chuan..." tih a ngai ziah a, World Cup 1966 kha black & white-in thlirlet a ngai fo.

Thawnthu hlui her lum leh ṭhin hi anmahni ngei pawhin an ning ve tawh a, a tak tak an duh tawh - 'golden generation' tia hming an pek hial, Steven Gerrard, David Beckham, Frank Lampard, John Terry, Rio Ferdinand, Paul Scholes, Michael Owen leh Wayne Rooney te khan beiseina bak pek an nei lo a, chu pawh a thamral ṭhin.

Gareth Southgate hoin England-in World Cup 2018 semifinal an lut a, Euro 2020 final an khel a, nomawi chawi chiah lo mah se, a hmuh erawh an hmu hnai sawt - 'a tawp nan' tiin beiseina an nei thar leh a, mahse, Southgate-a team hi an match hmasa ber aṭangin sawisel an hlawh nghal.

Three Lions hian Serbia chu 1-0 in an hneh a, point thum hlawh chhuak mah se, an khelh danah media ṭhenkhatin an sawisel nasa - zanin dar 9:30 hian Denmark an hmachhawn dawn a, England a nih tawh chuan boruak pawh a awm leh hat ang!

Sawiselna

Gareth Southgate-a'n Serbia lakah huaisen takin thutlukna a siam a, Liverpool right back Trent Alexander-Arnold chu midfield-ah Arsenal thiampuipa Declan Rice nen a inkawptir a, hei hi tam tak chuan an sawisel.

Liverpool defender hi ram tana a position tharah a khel chhe hran lo a, mahse, midfielder Conor Gallagher, Kobbie Mainoo leh Adam Wharton te awm reng laia Rice-a kawppui atana thlan a ni hian mak tih a hlawh.

Mahse, England coach Southgate chuan, "He team hi kan la inzir mek a, mi tam takin nuamsaa engkim paltlang mai turah min beisei a, mahse, hnathawh tur tam tak kan la nei," a ti a, an team an insiamrem mek thu a sawi.

Southgate-a ṭawngkam aṭanga tehin Arnold-a'n midfield-a Rice a kawp chhunzawm a rinawm a, tlarhnung laiah John Stones leh Crystal Palace centre back Marc Guéhi inkawpin, fullback hna chu Kyle Walker leh Kieran Trippier ten an chelh ang.

Beiseina kengtu Jude

La Liga-a a season hmasa berah Player of the Season a ni nghal a, Real Madrid tan Champions League leh La Liga nomawi a chawi - hei vang hian Jude Bellingham chunga beiseina a sang hi a awm lo hran lo a, zaninah England fan-ten an player thiam bik che tla lai hi hmuh an châk dawn.

Southgate chuan, "Bellingham hian ama thawnthu chu ngaihnawm takin a ziak mek - Serbia laka kan goal khung dan kha en ula, a tlan hun timing zia te kha inhmu thei ang. Kan forward te an khel ṭha em em vek a, goal kan khung zel ang tih ka ring," a ti.

Bellingham hian number 10 dinhmun a chelh chhunzawmin a rinawm a, amah thlawp turin Arsenal forward Bukayo Saka leh Premier League Player of the Season Phil Foden te an awm bawk a, tlarhmaah mal tlat turin Bayern Munich striker Harry Kane a la awm zui!

Mahse, Serbia lakah Foden a 'nil' a, Bellingham a awm avangin City angin a laia tal tam turin zalenna a nei tawk lo - he lai tak hi Southgate-a tan siamrem thiam a ṭul a, an tlarhma pali ringawt hi an 'click' hlauh chuan eng team pawh hneh turin an ṭha tawk.

Denmark an ṭha

England fan-ten beiseina an nei sang a, point thumah mai lungawi loin, inkhel hmuhnawm an beisei tel - mahse, an hmaa ding tur hi Denmark an ni a, Euro 2020 semifinal-a an lo hneh tawh mah ni se, hneh nawn tura an indah nghal chuan an tisual ang.

Match hmasa bera Slovenia nena inhnehtawk Denmark hian Manchester United striker Rasmus Hojlund an nei a, ani hi ram tan match 15 a khelh tawha goal sarih khung thei a ni a, VfL Wolfsburg foward Jonas Wind nen inkawpin, Christian Eriksen chu false 9 angin a awm leh a rinawm.

Denmark coach Kasper Hjulmand chu 3-4-1-2 hmang leh tura beisei a ni a, midfield laiah Tottenham Hotspur midfield Pierre-Emile Hojbjerg leh Sporting Lisbon defensive midfielder ṭha Morten Hjulmand te an inkawp ang a, England goal nawr tur dan chah an tum ang.

Leeds United right back Rasmus Kristensen leh Benfica right back Alexander Bah ten wing-back hna chelhin, a laiah Crystal Palace centre back Joachim Andersen, Barcelona defender Andreas Christensen leh Leicester City player Jannik Vestergaard te an inkawp ang a, si ban nghak turin kum 37 mi Kasper Schmeichel a la rintlak reng bawk.