Zaninah MFA Futsal League semifnal : Tuikhuahtlang Vs Senator; Thlangtiang Vs Tlangnmuam

BR Studio MFA Futsal 2023-24 semifinal chu zanin hian R. Dengthuama Indoor Stadium-ah semifinal khelh a ni dawn. Nimin khan league round khelh zawh a ni a; Thlangtiang FC (Luangmual), Tuikhuahtlang FC, Senator FC (Tuikual South) leh Tlangnuam FC ten semifinal an lut. Inkhel hi BR Studio YouTube channel-ah live-a pekchhuah a ni ang.

Zanin dar 7:00 hian pahnihna Tuikhuahtlang FC leh pathumna Senator FC te an inkhel dawn a, dar 8:30-ah pakhatna Thlangtiang FC leh Tlangnuam FC te an inkhel chhunzawm ang. Futsal League aṭang hian Lawmna FC (Dinthar), MFN FC (Laipuitlang) leh KFC (Republic Veng) te chu an relegate a; Division One aṭangin Delija FC (Chawnpui), Ramhlun North FC leh JKFC (Chanmari) te Futsal League khel turin an tling thung.

Nimin khan Thlangtiang chu league round match hnuhnung berah Lawmna FC, Dinthar nen 4-4 in an inhnehtawk a, match 12 aṭangin point 27 hmuin Tuikhuahtlang nen point hmuh zat inang mah se head to head-ah an ṭha zawk. Tlangnuam FC hian nimin vek khan MFN, Lapuitlang 9-1 in an hneh a, hun rei lote chhung pathumnaah awm mah se Senator-in an khingpui Zonuam FC 10-1 a an hneh avangin palinaah an tla thla.

Tlangnuam leh Senator te hian point 25 ve ve an hmu a, goal difference-ah Tlangnuam ṭha zawk mah se head to head-ah Senator an chungnung zawk. League round-ah Senator hian Tlangnuam hi 3-1 in an hneh.

Thlangtiang hi an squad a chhah ṭha a, champion rinkai an nih bakah league round-ah pakhatna ni mah se Tlangnuam lakah hian 5-2 in an tlawm tih hriat a ṭha. Tlangnuam hian Jones Lalthankima leh Kiran Chhetri te an kawl a, Thlangtiangin MPL10 best player Lalbiakthanga Hmar bakah R. Lamuankima, Lalfakkima, Johnathan Lalrawngbawla leh Lelvenhima te an nei - an squad a chhah hle.

Inkhel hmasa tur zawk Senator leh Tuikhuahtlang te pawh team ṭha ve ve an ni. Senator lamin ISL club Hyderabad tana khel Aron Valalrinchhana an nei a, Aizawl FC defender Laldanmawia an kawl bawk. Tuikhuahtlang lamin Lalchhanhima Sailo, Lalawmpuia Hnamte leh Lalramzauva Khiangte te an nei a, an inkhel tawk khawp ang.

Futsal League hi BR Studio bakah Roland, Aizawl Rice Bowl, Daphalsa Enterprise, MJ Futsal leh CellCare ten an sponsor a ni.