India fiahtu tur Afghanistan

T20 Cricket World Cup Super 8-ah zanin dar 8:00 hian India leh Afghanistan te an inkhel dawn. Group A-ah India, Australia, Afghanistan leh Bangladesh te an awm a, team pahnih chauhin semifinal an luh dawn avangin vawi khat chak lo a pawi thei ang.

June 21, Zirtawpni zing dar 6:00-ah Australia leh Bangladesh te an inkhel zui dawn a, ODI World Cup leh World Test C'ship-a nomawi kawltu Aussies hi T20 World Cup-ah pawh hian champion tura rin hlawh ber an ni.

Tun ṭum inelnaah hian India-in hneh loh an la tawng lo a, mahse Pakistan leh United States an hneh danah vanneihna an mamawh tel. Ruahsur vangin Canada nen an inkhel thei lo a, Ireland chauh harsatna tel loin an hneh.

India batter chhuanvawr Virat Kohli a la che ṭha lo a, Ireland nen run khat chauh siamin Pakistan nen run li a siam a, United States nen an duck out. Tun inelnaa match thum khelh tawh aṭangin Kohli-a'n run nga chauh a la siam a, bul a ṭanpui ṭhin Rohit Sharma-a'n Ireland lakah 52 runs siam bakah a hnuhnung pahniha a run siam zat belhkhawm chu 16 runs chauh a ni.

Chutihrualin Jasprit Bumrah erawh a che ṭha ṭhin a, India-in hneh loh nei loa Super 8 an thlen chhan pawh hi batting department lam ni loin bowling department chet ṭhat vangah a ngaih theih.

India khingpui tur Afghanistan hian West Indies hnehlo mah se New Zealand an sawp thei a, India tan fimkhur a ṭul dawn. Group stage-ah Rahmanullah Gurbaz-a'n 167 runs siamin tun inelnaa run siam tam ber a ni a, Fazalhaq Farooqi pawhin wicket 12 la tawhin wicket la hnem ber a ni bawk.

India leh Afghanistan te T20 match-a an inkhelh hnuhnun ber chu kumin January thla khan ni a, an inhnehtawk. Team ṭahnih hi zanina an khelhna tur Barbados-ah hian tun ṭum inelnaah an la khel lo ve ve.

Inlan tura beseite

India

Batters : Virat Kohli, Rohit Sharma, Suryakumar Yadav

All-Rounders : Hardik Pandya, Axar Patel, Ravindra Jadeja, Shivam Dube

Wicketkeeper : Rishabh Pant

Bowlers : Jasprit Bumrah, Mohammed Siraj, Arshdeep Singh

Afghanistan

Batters : Ibrahim Zadran, Gulbadin Naib, Najibulah Zadran

All-Rounders : Mohammad Nabi, Azmatullah Omarzai, Rashid Khan, Nangeyalia Kharote

Wicketkeeper : Rahmanullah Gurbaz,

Bowlers : Noor Ahmad, Naveen-ul-Haq, Fazalhaq Farooqi