Chelsea dilna Atletico-in an hnawl

Premier League club intuaithar tum Chelsea chuan Atletico Madrid striker Samu Omorodion lakluh tum mah se, an dawrna hi Spanish club hian an lo hnar.

Chelsea leh Atletico hi a tirah tak chuan pangngai takin an indawr a, Blues hian pound maktaduai 34 bakah a khelh ṭhat dan a zira pek belh an inhuam. Mahse, Spanish club hian he dawrna hi hnarin, Chelsea chu anmahni dawr nawn tawh lo turin an hrilh.

Omorodion hian season hman zawh tak kha La Liga club Deportivo Alaves-ah loan-a khelin, match 35-ah goal kua a khungsak a, Atletico hian contract thar ziahpui an tum zawk.

Chelsea hi an dan pangngaiin bazar an la tum nasa viau niin a lang. Aston Villa forward, kum 20 mi Jhon Duran chu lakluh an duh a, kum 22 mi Dutch defender Ian Maatsen nena inthlengah Villa hi an dil.

Blues hian Stuttgart forward Serhou Guirassy chu an hel bawk a, Kum 28 mi Guinea international hian season hman zawh takah khan match 30 khelin goal 30 a khung a, £15mtd leka tun nipuia chhuah theihna dan a nei.

London club hian Crystal Palace winger Michael Olise biak phalna an nei tawh bawk a, kum 22 mi Olise hian season hman zawh takah khan match 19 khela goal 10 khungin, assist vawi ruk a nei a, mahse, Newcastle United leh Bayern Munich ten an duh ve avangin awlsam taka chan theih a ni lo ang.

Olise hi a contract-ah £60mtd-a lei chhuah theihna dan a awm a, mahse, a contract-ah hian Palace bakah a club hlui Reading leh amah Olise ten a man zatah share an neih theihna dan a awm a, tihfel tur a tam dawn!

Chelsea hi transfer lamah an che rang vut vut hle. Kum 26 mi English defender Tosin Adarabioyo chu Fulham aṭangin free transfer-in an la lut tawh a, Palmeiras winger Estevao Willian chu an la lut hnai bawk.

Mahse, £29mtd man Willian hi kum 17 chauh a la nih avangin tun season-ah chuan Blues a la zawm thei dawn lo a, tunah an inrem a nih pawhin 2025-26 season ṭan dawnah a zawm thei chauh ang.