Vawiinah Charity Match : RG Stadium-a Mizo footballer ṭhate inlar hun

Lallianzuala Chhangte, Lalengmawia Ralte, Edmund Lalrindika, David Lalhlansanga bakah Mizo footballer ṭha dang inkhel thlir duh tan, zanin hi hun ṭha a ni. Zanin dar 8:00 hian ISL leh I League player-te RG Stadium-ah an inhmachhawn dawn a, hetiang hun ṭha hi a inher chhuak nawn meuh lo - bawhpelh suh ang che.

Charity Match hi Cyclone Remal vanga chhiat tawkte ṭanpui nan MFA leh Mizo Professional Footballers Association (MPFA) te buatsaih a ni a, inkhel en man hi Rs 100 chauh a ni. Ticket la lei lawk lo tan pawh a hmunah ticket lei tur a awm dawn a, tlai dar 4:00 aṭangin stadium-ah a luh theih ang.

Tlai dar 5:30-ah All Star Football match khelh a ni dawn a, kawng hrang hranga Mizo mipui hriat hlawhten an khel dawn. Inkhel zawh hian zai leh lam hmangin charity match en tura kalkhawmte ennawm chhawpsak an ni ang. Ṭhutna ṭha duh tan kal hma a finthlak dawn.

Tlan chak leh ṭha

RG Stadium-ah India international pahnih Lianzuala leh Edmund te inkhel hmuh tur a awm dawn a, hei ringawt pawh hi punkhawm chhan a ni thei ang. Lianzuala tlan chakna leh ṭhatna hi ennawm a tling a, tun dinhmuna India ram puma winger ṭha bera chhal ngam a ni tlat.

Sunil Chhetri a chawl tawh a, a awm loh hnua India tana goal khung leh hmasa ber chu Lianzuala hi a ni. Qatar laka goal khungtu hi India star thar tiin a chhal ngam a, TV-ah ni loin, khelmualah ngei a chevel hmuh tur a awm dawn.

Edmund hi theihna nei sang, hliam vanga a nih tur ang thleng har a ni. Inter Kashi tan season ṭha tak a hmang zo a, I League khel chung siin India tan koh a ni a, minute pawh a nei hial. Leitlangpui tlangval pahnihin Mizo hming an ti ṭha a, zaninah team hran ve veah an khel dawn. Lianzuala hnung zui turin Edmund hi a ṭha tawk em, tih pawh a hriat theih ang.

Apuia, Isak etc

India tana FIFA World Cup Under 17-a inlan thei Apuia hi Indian player zinga defensive midfielder ṭha bera chhal ngam a ni a, ISL final-ah khan a ṭhatzia lantirin a awm. Vaivakawn tlangval hian midfield-ah ball a pawt muang thei a, inrintawkna a ngahzia leh a theihna sanzia hi en a châkawm tawh hle.

Apuia leh a khelhpui Lianzuala an thlir ṭhup karah Isak Vanlalruatfela hi a rawn langsar zawk thei bawk. Isak-a chevel hi a hmuhnawm a, ISL foreign player-te pawhin dan harsa an ti ṭhin hle.

ISL lamah Isaac Vanmalsawma, Ramhlunchhunga leh Rochharzela te hi ball thiam tak vek an ni a, chutihrualin I League lamin 'Mizo Messi' hming lem an pek Lalchungnunga an kawl. Brandon VL Remdika, Samuel Lalmuanpuia leh Jeremy Laldinpuia te hian ISL defender te tan harsatna an siam thei ang.

MPL-a siam

ISL tlarhnungah India tana khel tawh Lalchungnunga te an awm a; Laldinpuia Pachuau, Jerry Lalrinzuala, Hmingthanmawia, Laldinliana Renthlei leh Ricky Lallawmawma te an awm bawk. An vai hian MPL khel tawh vek an ni a, Jerry tih loh player dang zawng hi chu MPL vanga tun hun thleng theia chhal ngam an ni.

I League tlarhnung pawh MPL khel tawh vek an ni a; Luangmual, Chanmari leh Aizawl FC defender hlui Lalruatthara ngat phei chu ISL Emerging Player of The League-a thlan a ni tawh. Tlarhnung chauh a ni lo a, midfielder leh forward te pawh MPL-a inchher hriam tawh an ni hlawm.

Tualchhung football tuipuite chuan K. Lalrinfela theihna sanzia an hre ṭheuh ang. Aizawl FC midfielder Mafela hi ISL midfielder hmaa fiaha a awm tur en a châkawm tawh a, a bula ding turin Lalnuntluanga emaw Lalromawia emaw te an awm bawk avangin inrintawkna pawh a ngah khawp ang.

David Lalhlansanga'n Mohammedan SC tan hming a chher a, season tharah ISL club East Bengal tan a khel dawn. India squad-a koh hial David-a hi Aizawl FC aṭanga inzir chhuak a ni a, MPL a khelh laiin hriat hlawh tawk lo mah se Kolkata-a hming chher thei ngat a ni. David hi Aizawl FC tana a khelhpui ṭhin Lalremsanga te nen an inthlawp thei dawn a, ISL tlarhnung tan ven an har ve khawp ang.

Engtin zel?

Team enkawltute pawh S. Malsawmtluanga leh Jeje Lalpekhlua te an ni a, hming a hraw hlawm hle. Jeje-a'n Charity match ni mah se chak lo zawk nih an duh loh tur thu a sawi a, hei hian inkhel a tihmuhnawm sawt ang.

MPFA hian kum 2010 aṭang khan charity match hi an buatsaih ṭan tawh. Hnahthial leh Lungleiah vawi hnih ve ve an buatsaih tawh a, Champhai, Serchhip, Kolasib, Khawzawl leh Saitualah vawi khat ṭheuh an buatsaih tawh bawk. Tun ṭum hi MPFA chauh ni loin MFA nen ṭangkawpa buatsaih a nih bakah Aizawla khelh tur a nih avangin entu pawh an ṭhahnem ngei tura ngaih a ni.