Germany-in last 16 an lut

Euro 2024-ah inelna thlengtu Germany-in Nilaini zan khan Hungary 2-0 in an hneh a, match hnih khelhah chak ve vein last 16 an lut. Julian Nagelsmann-a hote hi an group-a pakhatna ni tur chuan Switzerland lakah point hlawhchhuah a la ngai. Group A inkhel dangah Scotland leh Switzerland te 1-1 in an inhnehtawk ve bawk.

Germany tan Jamal Musiala a vul leh pek a, Bayern Munich midfielder hian minute 22-naah goal hmahruai khungin captain Ilkay Gundogan-a'n minute 67-naah a khung belh. Nagelsmann-a'n Toni Kroos a ko let fuh a, Kroos hi 'game rhythm' siamtu niin Florian Wirtz leh Musiala ten football mawina an pho chhuak. Die Mannschaft hian goal chance pawh ngahin inkhel an thunun hle.

Chutihrualin Hungary hian Germany tlarhnung tan buaina an siam a, inkhelh ṭan chiahah goal khung nghal thei niin Manuel Neuer-a'n a dang ṭha hle. Bayern Munich keeper hian ṭum khat man sual nei bawk mah se Germany clean sheet theih nan a pawimawh. Neuer chet ṭhat ṭum ni lo se, result a danglam thei hial ang.

Cologne-ah Scotland beiseina chhi nung turin Scott McTominay-a'n minute 13-naah goal hmahruai a khung a, Switzerland-in mintue 26-naah si phurh an sut. Box pawn aṭangin Xherdan Shaqiri-a'n mawi zetin a khung. 1-1 in inkhel a tawp a, group A team pali tan last 16 luh theihna kawng a la inhawng vek.

Die Mannschaft hi pakhatna an nih chuan group C-a pahnihna nen an inhmachhawn dawn a, group C-ah hian England, Denmark, Slovenia leh Serbia te an awm. Pahnihna an nih thung erawh chuan group B pahnihna an hmachawn dawn a; Spain, Italy, Albania leh Croatia te awmna group a nih avangin Germany tan an group-a pakhatna nih hi a pawimawh ang.