South Africa leh England an chak

T20 World Cup Super 8 chu June 19, Nilaini aṭangin khelh ṭan a ni a, team ṭha pahnih South Africa leh England ten hnehna an chang. South Africa hian United States hmachhawnin 18 runs-in an chak a, champion lai England-in inelna thlengtu West Windies wicket riatin an hneh bawk.

US an ṭang thei

United States-in Pakistan hnehin Super 8-ah an invawtling a, stage sang zawkah South Africa hmachhawnin chak lo mah se an zahpuiawm loh. Proteas hian bat hmasain 194/4 runs an siam a, Quiton de Kock (74) leh Aiden Makram (46) leh Heinrich Klaasen (36*) te an che ṭha.

United States tan target a sang mah mahin lang mah se opener Andries Gous-a'n thi loin 80 runs a siam a, Proteas thin phu a ti rang pha. US hian 18 overs zawhah 167 runs an siam a, over hnihah 28 runs siam an mamawh. Mahse, Kagiso Rabada-a'n over 19-na a rawn vawm ṭha a, wicket pawimawh a rawn lak bakah run hnih chauh a siamtir. Anrich Norje-a'n over tawp ber a rawn khar a, US hian over 20-ah 176/6 runs siamin, 18 runs-in an chak lo.

Salt a al ṭha

England-in league round-ah beisei an pha lo a, Super 8 lut lo thei dinhmunah an ding. Mahse, Super 8 a inṭan chiah a, an theihna lantir nghal. Beausejour Stadium-ah Three Lions-in vawm hmasak an thlang a, Windies an che chhe lo.

Johnson Charles (38), Rovman Powell (36) leh Nicholas Pooran (36) te hmangin 180/4 runs an siam a, tun ṭum inelna aṭanga thlir chuan chakpui tham a tling. Mahse, England opner Salt-a'n hna a rawn thawk ṭha.

Salt hian ball 47-ah thi loin 87 runs an siam a, wicket hmasa ber an hlohin 67 runs an siam tawh a; Jos Buttler (27), Moeen Ali (13) leh Jonny Bairstow (48*) ten an thlawp ṭhat avangin over 17.3-ah 181/2 runs siamin hnehna an chang.

England hian zanin dar 8:00 hian South Africa an hmachhawn dawn a, heta chak zawk hian semifinal an lut thei ang. June 22, Inrinni zingah United States leh Windies te an inkhel dawn a, a chak lo zawk lo zawk tan knockout stage luh beiseina a tawp thei ang.