Olympic khel tur Djokovic

Novak Djokovic chuan Paris Olympic 2024 khelh ngei a tum tih a sawi, tun dinhmunah hliam vangin chawl mek mah se infiamna khawmpui lianah hian Serbia aiawh a inlan theih ngei a beisei a ni.

Thla hmasa lama khelh French Open aṭangin Djokovic hi a inhnukdawk a, a hnu lamah tun thlengin tournament a la khel leh rih lo. July thla a khelh tur Wimbledon atan a dinhmun a la sawi chiang rih lo thung.

Tennis grass court season an hmang chho mek a, inelna lian Wimbledon leh Paris Olympic a inhnaihchilh dawn hle, hei vang hian player ṭhenkhat chuan Olympic an khelh loh tur thu an sawi.

Kum 37 mi Djokovic chungchang sawiin Serbian Olympic Committee chuan, "Novak Djokovic leh Dusan Lajovic te chu ATP lama an ranking a ṭhat avangin Olympic Games lamah an inlan thei dawn," an ti.

April thla khan Serbian star Novak hian, "Olympic hi ka tan a pawimawh a, kei chuan engtik lai pawhin ka dah sangin ka dah pawimawh," tiin a lo sawi tawh a, a taksain a tlin a nih phawt chuan inlan ngei a tum.

Djokovic hian an ram Serbia a dah pawimawh ṭhin a, hliam leh harsatna lian tak a nei a nih ngawt loh chuan ram tan a feh chhuak ṭhin - tunah pawh a ngaihdan hi a la danglam chuang lo tihna a ni.

Kum 2008 aṭang khan Olympic hi a la khel ziah a, kuminah hian a inlan leh thei a nih chuan a vawi ngana tur a ni dawn a, a kum a tam ve tawh avangin atan a hnuhnung ber a ni ve thei tawh bawk ang.

Olympic a khelh hmasak ber ṭum hian Serbia tan bronze medal a hlawh chhuak a, a dang pathumah erawh medal a la lo. Vawi hnih chu pathumna zawnna inkhelah a vanduai zawkah a ṭang.

Paris khawpuiah hian July 27 aṭanga August 4 chhungin Olympic tennis bik hi khelh a ni dawn, inelna an neihna tur hu French Open an khelhna clay court kha a ni dawn a ni.

Ram tam takin Paris Olympic atana an player inlan tur an tifel tawh. Spain chuan Rafael Nadal leh Carlos Alcaraz te chu mipa doubles huangah an inkawp tir dawn - Britain tan Andy Murray pawh inlan tura beisei a ni ve bawk.