Pistons coach Williams an ban

NBA team zinga mi Detroit Pistons chuan an coach Monty Williams chu season khat lek an rawih hnuah an ban, an inṭhen chhan hi season an hman chhiat em vang a ni.

Basketball inelna lian NBA season hman zawh takah khan Detroit Pistons hian vawi 14 chauh chak ni hmel an hmu a, ṭum 68 tehmeuh chu an khingpuite lakah an tlawm thung.

Pistons neitu Tom Gores chuan, "Hetiang thutlukna siam hi chu a hrehawmin a harsa ṭhin hle. Monty-a hian kan team tan rim takin a bei a, a hnathawhte avangin a chungah lawmthu kan sawi takzet.

"Team enkawl hna hi chu a danglam a, player enkawl hna hi chu a hautak ṭhin hle. Danglamna neih kan duh a, chumi atan chuan hetiang hian thu kan ti tlu," tiin a sawi.