Leicester manager thar Cooper

Premier League khel tura kir leh Leicester City chuan manager thar an nei, a hming chu Steve Cooper a ni - Foxes hian Nottingham Forest manager hlui hi kum thum daih turin contract a ziah pui.

Kum 44 mi Cooper hian kum 2023 December thla khan Forest enkawl hna a kalsan a, a hnu lamah tum ṭum hi team enkawl hna a thawh lehna tur hmasa ber a ni ang.

Season hmasa khan Leicester City hi Championship lamah an che ṭha hle a, English football inelna sang ber EPL khel tur pawhin an tling, an manager Enzo Maresca chu Chelsea-in an lo chhuhsak a ni.

June thla tir khan Maresca hi a chhuak a, a hnu lamah Foxes hian manager thar an melh ngar ngar. An lak thar tak Cooper chuan, "Leicester City manager ka ni thei tur hi ka lawmin ka inchhuang hle.

"Club ropui leh sulhnu nei ṭha, tun hma lama hlawhtlinna sang tak tak lo tawng tawh a ni a, player ṭha leh theihna nei sang tak takte nena kan thawkho thei tur hi ka lawm," a ti.