Spanish GP atan Verstappen inringtawk

Formula 1 chu chawlhkar khat an chawlh hnuin tunkar tawp hian an tlan leh tawh dawn - world champion Max Verstappen chuan Spanish Grand Prix an tlan tur atan a inringtawk tih a sawi.

Red Bull driver hian kum 2016 khan he hmunah hian a vawi khat nan hnehna a chang a, tun hnai season hnih chhung chu a chak ber a ni bawk. Pathianni zana an tlan hunah pawh rinkai a ni leh ang.

Dutch tlangval Max Verstappen chuan, "Circuit de Barcelona-Catalunya hi a nuam ka ti, a ṭhenkhat laiah chak tak taka tlan theih a nih laiin, hmun ṭhenkhatah erawh muang leh fimkhur taka tlan a ngai ṭhin.

"Canada lama kan chet fuhna ang kha chhawm nun kan tum dawn a, kei leh ka team chu intlansiak tur hian kan inpeih leh tawh hle a ni," a ti. Driver championship lamah amah hnaih bertu Charles Leclerc-a aiin point 56 zetin a sang fal mek a ni.

Verstappen a chet fuh viau lai hian, a teammate leh tun hnaia contract thar ziaktu Sergio Perez chu a zawnin a tlan tluan thei lo a, tun kar tawpah chuan hnehna chan aiin ṭha taka tlan chhuah chu a tum tur a ni ang.