England leh Denmark an inhnehtawk
Harry Kane-a goal khung chu Morten Hjulmand chuan hla tak aṭangin a sut a, goal dang a lut zui lo - Euro 2024 champion tum England leh Denmark te 1-1 in an inhnehtawk, inkhelh bana titi ti tamtu chu Gareth Southgate a ni.
“England, England, Football hi a lo haw ngai lo ang,” tiin inkhelh ṭan hmain Denmark ṭantute an au rual dual dual a; Deutsche Bank Park-ah kawrt var leh a sen ha an inau el tawn nasa hle, boruak a nung takzet.
Three Lions hian Serbia leh Slovenia an inhnehtawk tih hresa chungin match an khel a, chak ni se la chuan last 16 lut chiang nghal thei an ni, an chak zawh loh avangin an dinhmun tichiang turin match hnuhnung ber an nghah a ngai.
A ngai bawk!
Premier League neitu an ni a, player langsar leh ṭha an ngah - Euro ṭan hma aṭangin tute nge England tan inlan ang tih an inrinsiak nasa a, manager Southgate-a'n Serbia hmachhawntu ngaite bawk chu Denmark lakah bul a ṭan nawntir.
Goal kan hmu har vak lo - midfieder atana hman Trent Alexander Arnold chuan mual sir lamah ball a pe lut a, defender Victor Kristiansen tan harsa vak loa lo chinfel mai theih tur niin a lang, mahse a muang sual hret.
Defender tlan chak Kyle Walker a rawn dawk chhuak zawk a, ani hian box chhung hlauhawm laiah a cross lut; striker ṭha Kane chu a awmna hmun tur dik takah lo awmin England goal hmahruai a khung.
Bayern Munich striker hian England tan major tournament paliah a zawnin goal a khung ta vek a, an ram chu dinhmun ṭhaah a dah, mahse chawlhlawk hmain goal an chhuah leh tlat.
Yard 25 zeta hlaah a ni a, ball hlauhawm ni tur pawha lang lo kha Morten Hjulmand-a'n goal lamah a hlap thut a, goal kilah kalin goalkeeper Jordan Pickford tan dan phak a ni tawh lo, an hawihai teh asin!
Chhuanlam an zawng
England tlarhma an hriam tawk lo a, captain Kane thlawptu Bukayo Saka leh Phil Foden ten beisei an phak lo - Chelsea tana season duhawm hmangtu Cole Palmer tan erawh hmun a la awm lo a, defender Arnold khelh danin sawi a hlawh bawk.
Goal mamawh a nat laiin tlarhmaa khel pathum Saka, Kane leh Foden te la chhuakin Jarrod Bowen, Ollie Watkins leh Eberechi Eze te dah luh an ni thung a, anni pawh hian danglamna an thlen thei ta chuang lo.
Three Lions manager Southgate chuan, "Kan khelh danah mipui an lungawi lo tih ka hria, kan dem lo. Tun aia ball chang tam leh khel ṭha zawk tur kha ka ni," a ti a, midfield chungchanga Kalvin Phillips thlaktu tur an neih loh a sawi erawh dem lettu an tam.
Manchester United duhlai Kobbie Mainoo leh Crystal Palace player chhuak thar Adam Wharton te hruai ve mah se a ringtawk rih lo a, group stage hi inenchhin nan a hmang dawn niin a lang, an ṭhat dan taka a rem khawm fuh thuai a nih loh chuan sawisel a hlawh nasa zual dawn.
Group match khelh hmabak pakhat an la nei, social media lama sawi hlawh Palmer hi hun a pe dawn nge ni a, tournament dang ang bawkin Southgate hi ama ngaihdan ngaiin a kal lui chhunzawm dawn tih hriat a châkawm tawh hle.