Zanin dar 8:30-ah MFA Futsal League Final : Senator FC vs Thlangtiang FC

BR Studio MFA Futsal 2023-24 final chu zanin dar 8:30 hian R. Dengṭhuama Indoor Stadium-ah Tuikual South club Senator FC leh Luangmual club Thlangtiang FC ten an khel dawn. Senator hian final lut turin Tuikhuahtlang an hneh a, Thlangtiang hian Tlangnuam an hneh thung.

Aron-a Show

Senator hi league round-ah pathumna ni mah se Aron Vanlalrinchhana hattrick zarah final an lut. Tuikual South club hian team ṭha Tuikhuahtlang 4-2 in an hneh a, inkhel hmuhnawm an chhawp chhuak. TKT tan captain Lalchhantluanga'n minute nga lekah goal hmahruai freekick aṭangin a khung a, bench aṭanga lut Hrangvunga'n minute 13-naah Senator tan a sut.

Cherhlun tlangval Aron-a'n darkar chanvenaah hiah a back volley lut a, Senator-in hma an hruai. TKT-in Chhantea Sailo hmangin siphurh sut leh mah se Aron-a'n theihna sang a 'show' zui. Aron-a hian minute 50 inkhel turah minute 48-naah hmahruaina goal khung a, minute 50-naah chak nemnghetna goal a khung leh bawk.

Thlangtiang an tlo

Semifinal hnuhnung zawkah Thomas Lalengkima enkawl Thlangtiang leh Malsawmfela enkawl Tlangmual an inkhel a, a hmuhnawm hle. Hun pangngaiah 2-2 in an inhnehtawk a, Tlangnuam hian Kiran Chhetri-a'n hmahruaina goal ke chhip lut mah se Lalmuankima freekick leh Lalremruata te goal hmangin Thlangtiangin an lehthal.

Tlangnuam tan Kiran Chhetri a langsar a, second half-ah siphurh a sut. Hun pangngaiah goal a luh tawh lo a, extra time-ah pawh a lut chuang lo. Penalty hmangin chak zawk zawn a ni a, Thlangtiang 4-3 in an vannei ta zawk. Goalkeeper Moses-a chu Thlangtiang 'hero' a ni.

Engtin zel?

MFA Futsal League hi a vawi ngana a ni a, a hmasa pahnihah Chanmari Zothan Futsal an champion a, Electric Veng leh FC Thyristor (Ramhlun Venglai) te an champion tawh bawk. Champion lai Thyristor hian AIFF Futsa Club Championship an khelh avangin tun ṭum inelnaah hian tel lo a, champion thar an awm dawn.

Futsal League aṭang hian Lawmna FC (Dinthar), MFN FC (Laipuitlang) leh KFC (Republic Veng) te chu an relegate a; Division One aṭangin Delija FC (Chawnpui), Ramhlun North FC leh JKFC (Chanmari) te Futsal League khel turin an tling thung. Tun season Futsal League hi BR Studio bakah Roland, Aizawl Rice Bowl, Daphalsa Enterprise (Durtlang Leitan), MJ Futsal leh CellCare ten an sponsor a ni.