Ronaldo hmaah 'Turkish Messi'

Portugal chuan Cristiano Ronaldo hoin zanin dar 9:30 hian Euro 2024 an group match pahnihna an khel dawn, an khingpui tur Turkey hian player chhuak thar an nei - a hming chu Arda Guler niin 'Turkish Messi' tia sawi ṭhin a ni.

European Championship goal khung thei naupang ber chu Ronaldo a ni ṭhin, mahse tun hnai khan Turkey fa chuam Guler hian hun rei tak record lo ding tawh hi a rawn khum a, zaninah pawh en bik a hlawh ang.

Portugal hian an match hmasa berah Czech Republic chu 2-1 in an hneh, goal an phurh hmasak hnuah own goal hmangin an sut a, hun tawp dawnah chakna goal an khung hram.

Roberto Martinez-a naute hian player ṭha an ngah a, match hmasa ber an khelh dan erawhin beisei a phak chiah lo. Tournament tir lam hi chu eng team tan pawh a harsa ṭhin, match hnihna aṭang chuan hmuhnawm zawk tura ngaih an ni.

Ram pahnih inbeihna tur lai tak erawh midfield lai a nih a rinawm - Portugal hian Czech laka man of the match ni thei Vitinha an nei a, ani hi Manchester United captain Bruno Fernandes nen an inkawp leh ang.

Portuguese midfielder ṭha pahnih hi ball pass thiam, tlarhma lama player awm hmu zung zung thei leh inkhel khaikhawm thei tak an ni, anni pahnih thlawp tur hian Bernardo Silva an nei bawk.

Ball pass thiam zawnga kan sawi dawn a nih chuan Turkey hi an nep bik lo - a chhan chu Hakan Calhanoglu neitu an ni tlat. Inter Milan midfielder hi throughball pe thiam bik a ni a, club lama a inkhel en tam lo chuan zaninah lo chik rawh u.

Kum 30 mi Calhanoglu hian tawnhriat a nei ṭha tawk tawh a, Euro goal khung thei naupang ber kum 19 mi Arda Guler chawmtu a ni tih hre tel bawk ila; Martinez pawh ven dan tur a zir uluk viauin a rinawm.

Martinez-a enkawl Portugal hi qualifying match 10 an khelha chak kim vek an ni a, zaninah pawh inrintawkna an nei sang leh ang. Turkey pawh inelna hrang hrangah match nga chak ni hmel an hmuh loh hnua chak ve leh hlim niin an phur lai a ni ve bawk.