Hnehna nena bul ṭan Argentina

Copa America champion lai Argentina chuan nimin zing khan Canada 2-0 in an hneh. Lionel Messi awmna La Albiceleste hian an nomawi humhum turin a bul an ṭan fuh hle.

Mercedes-Benz Stadium, Atlanta-ah mipui 70,000 chuang an pungkhawm a, world champion ni mah se Argentina lamin goal an khung thei nghal mai bik lo, goal lut loin chawlhlawk chu an hmang phawt.

Second half tir lamah Messi chuan Canada player pahnih inkarah hlauhawm takin ball a lir lut a, midfielder Alexis Mac Allister chuan lo tawk pial zauhin, ball per hi Julian Alvarez chuan chiang zetin a khung.

Captain Messi a vannei tawk lo, goalkeeper Maxime Crépeau chauh a hmachhawn tawhah chip khum mah se goal ban hrulah a liam a, hun tawp dawna substitute Lautaro Martinez khung tur a siamsak erawh ṭha tak a ni.

Argentina hian Copa America 2021 nomawi an chawi a, South American ramte football inelna sangah hian an match hnuhnung pakuaah tlawm an nei lo, kuminah pawh champion tura rinkai an ni leh ang.

Argentina manager Lionel Scaloni chuan, "Hnehna kan chan avangin ka lawm, chak lo ni ila chuan chhuanlam siam tur kan zawng ang," a ti. An inkhelhna Mercedes-Benz Stadium-ah khan phul lem phah a ni a, inelna neih hma ni hnih lek awm tawhah phul tak dah chawp a ni.

Scaloni chuan sawi zawmin, "He hmunah hian kan inkhel dawn tih kha thla sarih liam ta khan kan hre tawh, mahse phul awmdan dik tak kha inkhelh hma ni hnih chauh awm tawhah kan hre chauh," a ti a, chhuanlam atan hmang chiah lo mah se a duhthusam erawh a ni lo.

Argentina hian June 26, Nilaini zingah Chile an hmachhawn leh dawn. Group A an match tawp ber atan June 30, Pathianni zingah Peru an la tum leh bawk dawn a ni.