Champion lai Italy hnehtu champion tur (?) Spain

Euro 2024-ah Ningani zan khan inkhel hmuhnawm en tur a awm - champion lai Italy leh Spain an intawng a, La Roja hian 1-0 in hnehna an chang. Inkhel hmuhnawm bik a ni a, game thununtu chu Spain an ni.

Scoreline hian inkhel a hrilhfiah tawk lo, tiin a sawi theih a, Spain che vel chu thawnthu ziak thiam takin, a duh thala ennawm tur thawnthu a ziak ang maia mit titlai a ni a, mi tam takin champion tura Spain an rinna a sang leh ta sawt.

Spain tana goal khungtu erawh Italy defender Riccardo Calafiori a ni a, Bologna defender hian Alvaro Morata-a ball tauh chu an lamah a dang lut - Italy keeper che ṭha em em Gianluigi Donnarumma tan pawh tihtheih a awm lo.

A tawpah chuan an phu ang ngeiin team chungnung zawk Spain an chak a, match hnih an khelh aṭanga point ruk an hmuh tawh avangin round of 16 an lut - Italy-in match hmasa berah Albania an hneh avangin beisei a la bo bik lo e.

Italy mawina Donnarumma

Spain-in an match hmasa berah team ṭha Croatia chu 3-0 in an sawp a, match hnihnaah harsatna nei miah loin Italy an hneh leh ta - Euro ṭantira group of death hminglem an pekin Spain mut a titui lo pha lo a, harsatna nei loin last 16 an lut der.

Italy-in an match hmasa berah inkhel hmuhnawm pho chhuakin, team ṭha Albania chu 2-1 in an hneh ve tho a, Spain nena an inkhel tur hi football fan-ten an nghakhlel hle - khelmual an luh meuh chuan Spain chungnunna a lang.

Azzuri tan Donnarumma chu an innghahna a ni a, kum 25 mi goalkeeper hian a dang hnem malh malh hle! Inkhel ṭantir lama Pedri tauh goal tur a dansak te, Fabian Ruiz leh Morata khung tur a dansakte chu keeper ṭha mi bik tan chauha tih chi a ni.

Spain tan Nico Williams leh kum 16 mi Lamine Yamal an hmuhnawm thlawt - kum 21 mi Nico hian uiawm taka a tauh out bakah, crossbar a tihper a, kum 16 mi Lamine Yamal pawhin Euro-a goal khung naupang ber record siamna chance a neih chu uiawm takin a chhawr lo.

A goal ta

Spain-in inkhel an thunun a, an goal nawr a na hle. Hetihlai hian Italy erawh ngam loh chala chil hnawm ang maiin an zakzum a, first half chhungin Spain penalty box-ah vawi thum chiah ball an tawk a, target-ah shot an nei miah lo bawk.

Italy hian counter-attack hmangin chance chu nei ve bawk mah se, han phulpui viau tham a ni hran lo! Spain tan Pedri leh Morata te bawkin chance duhawm neiin, an chhawr lo a, minute 56-naah erawh La Roja-in an khung ta nge nge.

Nico-a'n ṭha zeta ball a tlanpui hnuah Morata tan a cross a, Atletico Madrid striker hian a lo tauh thawi - hei hi lo dan tumtu Calafiori chuan an goal lamah a tauh lut a, keeper che ṭha Donnarumma tan meuh pawh tih theih a awm lo.

Spain tan bench aṭanga luhtir Ayoze Perez pawhin chance duhawm a nei ve leh a, mahse, a chance neih hi a chhawr lo. Hun tawp thlengin goal dang a lut lo a, chak phu Spain an chak.

An thiam

Croatia laka player hmuhnawm bik Yamal a hmuhnawm chhunzawm a, Barcelona winger hi kum 16 a ni ang tih pawh rinhlelhawm khawpin a thiam - Italy tlarhnungin tihngaihna meuh an hre lo a, a duhthala a che vel chu hmuhnawm tak a ni.

Nico sawi hmaih a thiang bik lo. Athletic Bilbao hian club lian zawk rimtu a nei ngah sawt dawn tih a chiang a, Italy tlarhnungten an veng hleithei meuh lo a ni ber!

Mual vei lam sirah Nico hi Marc Cucurella nen an inkawpfuh takzet a, Nico-a tal vel hi Italy right back Giovanni di Lorenzo-a'n dan ngaihna a hre meuh lo a ni ber - Spain khel a hmuhnawm takzet.

Ningani zana team pahnih intawn hmain, Italy manager Luciano Spalletti chuan a naute chu Giorgio Armani suit ha ang maia ni thlarh a, game pho chhuak turin a ti a, a tawpah chuan an thuam mawi tak chu hlihsakin, a mawina chentu chu Spain an ni ta.