Scotland kawng sialsak theitu Germany
Euro C'ship 2024-ah Germany-in June 23, Pathianni zan dar 12:30 hian group match hnuhnung berah Switzerland an hmachhawn dawn a, group A inkhel dangah Scotland leh Hungary te an inkhel dawn. Ram pali hian last 16 luh beiseina an la nei vek.
Inelnaah hian team 24 an tel a, group parukah pali zela ṭhendarh niin group tin aṭangin a sang pahnihin last 16 an lut dawn a, pathumna zinga tiṭha paliin knockout stage an lut bawk ang.
Germany thar chu
Ram inlenaah chuan Germany an ṭha ṭhin a, mahse World Cup 2014 an champion hnuah ṭum hnih ngawt first round an paltlang zo lo. Euro C'ship-ah pawh result ṭha an nei chuang lo a, Euro 1996 hnuah nomawi chawi tawh loin inelna hnuhnung berah last 16-ah an tla bawk.
Tun ṭumah erawh Germany hi inelna thlengtu an ni a, Julian Nagelsmann hnuaiah harhtharna changin kuminah hneh loh an la tawng lo. Match hmasa pahnihah Scotland leh Hungary te an hneh a, last 16 an lut der tawh.
Nagelsmann hian match hmasa pahnihah starting eleven ngai a luhtir a, last 16 an luh tho avangin player pahnih a thlak a nih pawhin a mak lo ang. Germany hian Jamal Musiala leh Florian Wirtz te thiamna hmang ṭangkaiin mual lai aṭangin an khingpui tlarhnung ṭhiah an tum ṭhin a; captain Ilkay Gundogan a tlan lut ṭha thei a, Kai Havertz-a'n kawng a hawnsak ṭha ṭhin.
Scotland leh Hungary lakah Germany game plan a hlawhtling a, chutihrualin tlarhnung erawh a nghing ve fo. Antonio Rudiger leh Jonathan Tah bakah anmahni thlawptu Robert Andrich te khel ṭha viau mah se hmasawnna tur a awm. Tun dinhmunah Andrich hi Germany team-ah no. 6 ṭha ber a ni a, last 16-a nung taka khelh chhunzawm theih nan Switzerland laka an hahdamtir a nih pawhin a mak lo ang.
World Cup 2022-a midfield uap lumtu Joshua Kimmich-a'n right back hna ṭha takin a chelh a, match hnuhnung berah man of the match-ah an thlang. Left back-a chhawr Maximilian Mittelstadt-a'n hming a chhawr chho mek a, Stuttgart defender hi goal nawr kawngah a ṭangkai tel.
Tla thei Switzerland
Point li hi last 16 luh nan a tawk thei a, chutihrualin a la him lo. Switzerland hian point li hmu tawh mah se point nga tal an hmuh loh chuan inkhel dang result-ah an innghat dawn. Marco Rossi hote hi dinhmun ṭha takah ding tawh mah se an khingpui tur hi inelna thlengtu Germany an nih miau avangin tla thei an la ni.
Switzerland tan Xherdan Shaqiri a la pawimawh reng a, Bayern Munich midfielder hlui hi MLS club Chicago Fire tan khel tawh mah se kum 32 mi chauh la ni tih hriat a ṭha. Manager Murat Yakin hian Yann Sommer, Manuel Akanji leh Granit Xhaka te a kawl a, last 16 a thlenpui loh chuan mualphona a ni thei ang.
Puitu mamawh Scotland
Scotland-in last 16 lut turin Germany puihna an mamawh a, chutihrualin point la hmu lo Hungary an hmachhawn dawn avangin Euro zinkawng chhunzawm zel an la inbeisei ang.
Steve Clarke hote hian Switzerland lakah point khat hlawh chhuak mah se, Germany laka 5-1 ngawta an tlawm avangin goal difference-ah inchhuahna tur an nei lo. Scotland hian Andrew Robertson, Scott McTominay leh John McGinn te an kawl nachungin Hungary laka chak chiang tura dah an rem lo.
Hungary hi FIFA ranking-ah pawh 26-na an nih laiin Scotland hi ranking-ah 39-na an ni chauh. Dominik Szoboszlai, Roland Sallai, Adam Nagy leh Peter Gulacsi te awmna team hian beiseina an la nei a, Stuttgart-a Scotland an hmachhawn hunah chak ngei an tum ve bawk ang.