Hmeichhe football-in hma a sawn zel - Susan

All India Football Federation chuan nimin khan New Delhi-ah Women's Football Strategy Workshop a buatsaih a, FIFA Expert Simon Toselli, FIFA Women's Development Programme-a mi chuan he hun hi a hmanpui.

MFA aiawh hian Executive Committee Member leh MFA Womens’ Committee Asst. Secretary Susan R Ralte a tel a, Susan chuan, "Women's Football Strategy Workshop hi ka hlawkpui a, min chona thar min pe. Hmeichhe football-in hma a sawn zel tih kan hmu a, a lawmawm takmeuh meuh a ni. Mizorama hman ṭangkai theih tur pawh awm ang," tiin Vanglaini a hrilh.

Susan chuan sawi chhunzawmin, "FIFA Expert Simon Toselli thusawi a ngaihnawm hle. France-in 2019 World Cup aṭanga Australia leh New Zealand ten 2023 World Cup-ah ringawt pawh a danglamna ṭhahnem tak a awm. Inkhel entu nasa takin an pung a, anmahni pualin sponsor pawh an nei tawh. Hmasawnna ṭhenkhat hi 100% aiin a tam hial. Khawvel anga chhutin hmeichhe inkhel nasa takin an pung bawk," tiin a sawi.

Ni khat awh Workshop-a tel tur hian AIFF-in State FA sawmbik neiin, chung zingah chuan Mizoram Football Association a tel. UNESCO, UNICEF leh UN aiawh ṭheuh an tel bakah IWL club aiawhte an tel bawk.

Susan chuan, "UNESCO leh UNICEF aiawhte hian hmeichhe team enkawltua mipa a thu ber an ni ṭhin chu an vei thu a sawi a; a thu berah hmeichhia awm thei se, tih chu an duhthusam a ni," tiin Vanglaini a hrilh.