India leh Australia an chak

T20 World Cup-ah India-in Super 8 match hmasa berah Afghanistan 27 runs-in an hneh a, Australia-in Bangladesh 28 runs-in (DLS Method) hmangin an hneh ve bawk. Zanin dar 8:00 hian Rohit Sharma hote hian Bangladesh an hmachhawn ang a; June 23, Pathianni zing dar 6:00-ah Australia-in Afghanistan an hmachhawn ve bawk ang. Men in Blue leh Aussies te hi an chak ve ve chuan, match hnih khelh lek aṭangin semifinal an lut thei dawn.

India an ṭha

Kensington Oval Barbados-ah ṭhumvawra vannei India-in bat hmasak an thlang a, inkhelhna hmunah hian chawhrualin 160 runs target vel siam ṭhin a ni. Men in Blue tan Virat Kohli-a'n a theihna tak la lantir lo mah se 24 runs a siam thei a, Rohit Sharma erawhin run riat chauh a siam.

Rishabh Pant (20) leh Suryakumar Yadav (53) ten dinhmun ṭhaah India an dah a, a bik takin ball 28 leka 53 runs siamtu SKY a che ṭha hle. Shivam Dube-a'n 10 runs chauh siamin beisei la pha lo chhunzawm a, Ravindra Jadeja pawhin run sarih chauh siam.

Axar Patel-a'n ball ruk aṭangin 12 runs a siam a, India-in over 20-ah 181/8 runs an tlin. Men in Blue batter ṭhenkhatin beisei la pha lo mah se an target siam erawh chakpui tham a ni.

Danglamna Bumrah

Afghanistan hian inelna ṭha tak an hmang a, an khelh ṭhat ṭumah chuan eng team pawh hneh thei an ni. Opener pahnih Rahmanullah Gabaz (11) leh Hazratullah Zazai (2) te hi an innghahna an ni a, mahse Gabaz leh Zazai hian Jasprit Bumrah ngam loin run tam siam loin pavilion lamah an kir.

Bumrah hian wicket pawimawh a lak bakah over li aṭangin run sarih chauh pe a, wicket thum a la bawk. Arshdeep Singh pawhin wicket thum tho a la a, over liah 36 runs a pe thung. Afghanistan hian over 20-ah 134 runs an siam a, an vaiin an thi vek. Ball tawp berah Arshdeep-a'n six vuak saktu Noor Ahmad a vawm hlum.

India captain Rohit Sharma chuan, "West Indies-ah hian inkhelin kan zin fo a, ground awm dan kan hre ṭha. Target ṭha tak kan chhawp chhuak a, kan bowling department lam pawh an khel ṭha," tiin inkhelh banah a sawi.

Aussies an chak zel

World Cup a nih tawh chuan Australia aia ṭha an awm lo a, pressure sangah Aussies hi an lehzual. Sir Vivian Richards Stadium-ah Aussies-in vawm hmasak an thlang a, Mitchell Starc-a'n run khat pawh siam loin opener Tanzid Hasan a vawm hlum. Captain Najmul Hossain Shanto-a'n 41 runs a rawn siam a, Towhid Hridoy-a'n 40 runs siam bawkin Bangladesh-in 140/8 runs an siam.

Aussies bowler Pat Cummins-a'n hattrick a siam a, T20 World Cup 2007 khan Brett Lee-a'n Bangladesh lakah hattrick a siam tawh bawk. Cummins hian over 18-na ball hnuhnung pahnihah Mahmudullah leh Mahedi Hasan te a vawm hlum a, over 20-na ball hmasa berah Towhid Hridoy a vawm hlum leh bawk.

Australia opener David Warner (53*) leh Travid Head (31) ten bul an ṭan ṭhat avangin hna awlsam tawh sa chu a awlsam lehzual. Ruahsur vangin target chu 73 runs-ah tih tlem a ni a, Aussies hian over 11.2-ah 100 runs siamin target hi an umpha a ni.