Belgium - kan hmu zel dawn em?

Kevin De Bruyne, Jan Vertonghen, Youri Tielemans, Romelu Lukaku, Axel Witsel, Yannick Carrasco leh Jeremy Doku te ho kawltu an ni a, Belgium ṭhatzia inhrilh nawn a ngai lo - mahse, he team hian Euro-a an match hmasa berah rin loh takin Slovakia chu 1-0 in an hneh lo.

Zanin dar 12:30-ah Belgium hian Romania an hmachhawn dawn a, KDB captain-na hnuaia khel team hi an tlawm leh a nih ngat chuan Euro-a cham chhunzawm zel turin an tan thilmak bak beisei tur a awm tawh lo ang.

Chu mai a ni lo - Eden Hazard a liam tawh a, Toby Alderweireld leh Thomas Vermaelen pawh an awm tawh lo. Vertonghen, Witsel, KDB leh Lukaku ten kum 30 an chuang vek tawh a, tun Euro-ah an thamral a nih ngat chuan Belgium 'golden generation' kan tih ṭhinte kha major tournament-a nomawi chawi loin an thamral dawn tihna a ni!

Belgium tan hei hi thlentir phal chi a ni lo a, zaninah thih tha nena Romania hmachhawn a ṭul dawn. Mahse, ni e, mahse, tih a ngai - Romania hian player langsar vut kawl lo mah se, an match hmasa berah anni aia player langsar kawl hnem Ukraine chu 3-0 ngawtin an sawp thei.

Romania inrintawk vanglai tak a ni a, Ukraine sawp thei team hian Slovakia ngam lotu lakah chak an tum ngam ang. Romanian midfielder Ianis Hagi chuan, "Kan match hmasa zawk nena khaikhin chi a ni dawn lo a, a danglam hlak dawn. Mahse, kan thinlung a huaisen a, kan inringtawk a, kan theihna kan hrechiang bawk.

"Kan coach pawh a phur viauin ka ring a, titura min tih apiang kan ti ang. Kan theihna kan lo pholang fo tawh a, tunah pawh kan ti leh ang. Kan thawhhona a ṭhat phawt chuan kan tithei vek a ni," a ti a, Belgium hneh theih a beisei.

Kum 25 mi Hagi hi Scottish club Rangers player a ni a, La Liga club Alavés-ah season hmasa kha loan-in a khel,a pa hi Romanian player ropui, Real Madrid leh Barcelona attacking midfielder hlui Gheorghe Hagi a ni a, 1990's chhoa Hagi vanglai hre pha, rual u zawkte chu an lung a leng ngei ang.

Romania-in Belgium 'surprise' an tum dawn a, he thil a thlen loh nan hian Belgium lamin insiamṭhat an mamawh - an mamawh ber chu goal khung zir ṭhat a ni! Slovakia lakah khan 61% zet ball chang chungin, vawi 16 shot an nei a, heng zinga panga hi goal zawnah a kal a, a pawimawh ber goal erawh an khung chuang lo.

Belgium tan coach Domenico Tedesco hnuaia an tlawm hmasak ber a ni tel nghal bawk a, Tedesco hnuaia a zawna a vawi khat nana tlawm hi an duh lo ang - Lukaku leh a ṭhianten goal khung an thiam tawh mahna!