Wales-in Rob Page an ban

Euro 2024 khel phak lo Wales chuan an manager Rob Page an ban a, kum thum leh a chanve zet Wales team hi a enkawl hman. Kum 49 mi Page hian World Cup 2022-ah khan Wales chu tlin puiin, kum 64 hnua an tlin hmasak ber a ni a, Euro 2020-ah khan round of 16 a hruai thleng bawk.

Mahse, Euro 2024-ah Wales a hruai thleng zo lo a, tun international break-ah khan friendly match hnih khelin, ram tenau Gibraltar chu 0-0 in an inhnehtawkpui a, Slovakia chuan 4-0 in an sawp bawk. Hetiang a nih avang hian Football Association of Wales (FAW) chuan an manager chungchang hi an ngaihtuah a, kar khat chuang zet an ngaihtuah hnuah ban turin thutlukna an siam ta a ni.