Burnley-in Nistelrooy an dawr

Premier League aṭanga tla hlim Burnley chuan coach tur an zawng mek a, Manchester United striker hlui Ruud van Nistelrooy chu English football-ah koh kir tumin hma an la mek - Dutch media-te chuan an inrem hnai tawh niin an sawi.

Clarets (Burnley sawina) hian season hman zawh tak kha Premier League-ah hun an hmang a, mahse, season khat bak an tlin lo. Match 38-ah vawi nga chiah chakin, vawi 24 an tlawm a, Championship lamah an kir.

Heti chung hian coach Vincent Kompany chu Bundesliga club Bayern Munich-in an coach ni turin an thlem lut a, Manchester City defender hlui thlak turin United striker hlui an dawr mek.

Burnley hian Nistelrooy bakah England international hlui pahnih Frank Lampard leh Scott Parker an dawr bawk a, mahse, Dutch coach hian an lung a len ber niin a lang - Wales international hlui Craig Bellamy chuan coach lailawk hna a chelh mek.

Player a nih laia goal khung thei hmingthang Nistelrooy hian Manchester United-ah season nga hun hmangin, match 219 a khelhsakah goal 150 ngawt a khung a, an ram club tenau Den Bosch aṭanga a career ṭanin, Heerenveen, PSV Eindhoven, Real Madrid, Hamburger SV leh Malaga tante a khel hman bawk.

Netherlands tan vawi 70 inlana goal 35 khungtu hian player ang chuan tawnhriat nei ṭha viau mah se, coaching lamah erawh tawnhriat a la nei tam lo. PSV Eindhoven reserve team enkawl tawhin, 2022-23 season-ah khan senior team a enkawl a, league-ah pahnihna nihpuiin, KNVB Cup leh Johan Cruyff Shield a lakpui bawk - nomawi a chawi der tawh.