Verstappen-a'n chak ngei a inring

Pathianni zan dar 6:30 hian Formula 1 Spanish Grand Prix an tlan dawn a, driver championship hmahruai mektu Max Verstappen chuan a chak ngei theih a beisei thu a sawi.

Circuit de Barcelona-Catalunya tlankawng hi Red Bull driver Verstappen tan hmun ṭha a ni, tun hnai season hnih chhung chu hnehna a chang tawh, kuminah pawh rin kai ber a ni leh dawn.

Dutch tlangval Verstappen chuan, "Tun hnaiah team dangten nasa takin hma an rawn sawn a, kan tan pawh ṭan a ngai zual hle. Inelna a sang tual tual a, tihsual pakhat lek neih pawh a rem tawh lo.

"Spanish GP pawh hi hriatthiam a harsa leh dawn, tun hnaia ka chet fuh ṭhinna ni mah se midang hian min huphurh hran lo ang, tlankawng hi kan zavaia kan hriatchian a nih avangin kan inum tawk leh hle ang.

"Kei chuan chak ngei tumin theihtawp ka chhuah leh dawn a, ka tana hmun hlu bik a nihna hi lantir leh ngei ka tum dawn a ni," a ti a, tun hma lama sulhnu ṭha a lo neih tawhna a nih avangin a theihnghilh thei lo.

Kum 2016 Spanish GP-ah khan, khatih laia kum 18 mi Verstappen hian hnehna a chang tawh a, car intlansiakna sang berah hian hnehna chang thei naupang ber record a lo siam tawh a, tun dinhmuna khawvel driver ṭha ber a ni thei ta a ni.