Hmasial lo Ronaldo

Euro 2024 khelh laiah Portugal chuan last 16 an lut fel der - Inrinni zan khan Roberto Martinez-a naute hian Turkey chu 3-0 in an sawp a, match khat khelh hmabak la nei mah se group F hmahruaitu an ni chiang tawh.

Signal Induna Park-a inkhelah Turkey an phur a, a tir lamah chuan goal hlauhawm pawh an nei hmasa zawk. Mahse, Portugal lamin Bernardo Silva hmangin goal an khung hmasa ta zawk, a hnu lam pawh an thunun chhunzawm.

Chawlhlawk hmain defender Samet Akaydin chuan anmahni lamah a ti lut palh, goalkeeper Altay Bayindir awmna ngaihtuah hmasa loin anmahni lamah a pet let a, keeper awmna in a lo zir loh avangin a dang hman tawh lo.

Second half-ah Cristiano Ronaldo kan hmu, Portugal captain hian goalkeeper Bayindir chauh a hmachhawn tawhah amahin a shot mai lo a, vengtu nei lo Bruno Fernandes a pe ta zawk - Manchester United captain hian vengtu awm tawh lohna goal-ah a khung.

Goal khung lo mah se Ronaldo chu inkhelh bana sawi hlawh ber a ni chhunzawm - Euro bikah Ronaldo hian a ṭhiante goal khung tur vawi riat a siamsak ta a; Karel Poborsky (Czech Republic) mi record chu a rawn nihrual ta chiah a ni.

Portugal manager Roberto Martinez chuan, "Czech Republic nen kan inkhelh ṭum ang bawk khan kan khel ṭha, goal hmasa ber kan khung khan thil kalhmang a ti danglam ta chiah a ni. Turkey khan goal nei hmasa ni se la chuan a danglam ve thei bawk.

"Group match khelh hmabak pakhat kan la nei, chumi chunga kan tlang thei hi a lawmawm. Kan squad-ah hian player ṭha tak tak khelmuala luh phu em em te an awm a, tuna la inlan remchang lote pawhin remchang an neih phah ang," a ti.

Martinez hian Silva chu goal nawr lama che na turin zalenna a pe zau a, midfield lailum luahtu Vitinha nen an inman rem rem hle; an pahnih hnungah Joao Cancelo awmin, anni pathum awmna lam hi Portugal hmanraw hlauhawm a ni chhunzawm dawn niin a lang.

Ronaldo sawi hmaih a thiang lo, mual sir lehlamah a la hnawk reng - a vanglai angin tlan tamin tharum ngah tawh lo mah se, ball a chan chuan thlahthlam chi a la ni lo, an khingpuiten an bawr karah midangin remchang an hmuh theihna kawng a hawnsak ngun hle.

Spanish manager Martinez chuan, "Tun ṭumah khan thil chhinchhiah tlak leh hmuhnawm tak ka hmu. Ronaldo hi goal khung mi a ni a, hun remchang ṭha bik a nei chungin midang tan a siamsak ta zawk. Hei hi Portugal player naupang zawkte pawhin an entawn atan ka duh.

"Mimal aiin team hi a pawimawh hmasa ber a, tun ṭum angah ngat phei kha chuan goal aiin assist kha kei chuan ka dah pawimawh hle a ni," a ti a, mimal hmingṭhatna aiin team dah hmasa turin a duh thih a sawi a ni.

Portugal inkhelh lai hian khelmual aṭangin mi panga ngawt an tlan lut - naupang pakhat chuan Ronaldo thla a lakpui a, an thla al dun lai hi social media lamah a darh nghal a, lar viau mah se player tan a him lo thei em tih erawh zawhna a ni thung.

Portugal manager Roberto Martinez chuan, "Mipui lamin player an hmuh chakzia leh ngaihsanzia kan hria, khatianga an tlan lut mai pawh kha an denawm loh. Mahse, mipui lut tur vengtu mi tam tak an awm a, kang mite khan lo dang thei se duhthusam a ni.

"Mipui lam pawhin hria se ka duh chu, khemual chhunga tlan luh hi thil tih dan tur leh kalphung a ni lo zawk," a ti. Bernardo Silva pawhin khelmuala lut an awm vanga inkhelh chawlh lailawk a ngai ṭhin chu pawi a tih thu a sawi ve bawk.

Group F inkhel dangah Czech Republic leh Georgia te 1-1 in an inhnehtawk bawk a, ram pahnih hian match hnih an khelh aṭangin point khat ve ve an hlawh chhuak. Hmahruaitu Portugal hnuaiah point thum neitu Turkey an awm.