A che che sih hlawkah - Croatia vs Italy

Aw nangni football ngainatute u, zan rei ei tur indap khawm ula, ṭhutna nuam ruahman ru - zaninah in men rei a ngai dawn ania! Zanin dar 12:30 hian Croatia leh Italy an intawng dawn.

Euro 2024 group of death hming lem an pek aṭangin Spain chu round of 16 lut tawh an ni a, Croatia, Italy leh Albania zingah an hnung zui tur a la chiang lo. Hei tak hi football tingaihnawmtu a ni a, he inkhel mmin en châk tirtu a ni.

Group B-ah hian Spain-in match hnihah point ruk hmuin, harsatna an nei lo a, Italy-in point thum an nei mek. Albania leh Croatia ten point khat ve ve an nei a, last 16 luh beiseina nei turin team pahnih tan chak a ngai.

Euro-ah hian group tina a sang pahnih bakah pathumna zinga a tiṭha zual pali chu last 16 an lut dawn a, Italy tan Croatia draw ringawt pawh hi a thiam 16 zinga tel nan a tawk thei ang - Croatia erawhin point thum an mamawh.

Hnemtu thawnthu

Croatia chanchinbu lar 24sata chuan thawnthu hlui keu letin, beiseina thar an nei a, "Italy lakah Croatia an la tlawm ngai lo" tih chu an headline a ni a, zaninah pawh Italy laka chak tumin an inringtawk hle.

Kum 1942 khan Croatia hian friendly match-ah Italy hi an lo ngam lo ve tawh a, mahse, a hnu match riatah erawh vawi thum hnehna changin vawi nga an inhnehtawk - zaninah an ngam fo ṭhin team hi ngam loh thut an tum lo.

Croatia hian Euro hma an match hnuhnung berah team ṭha Portugal chu 2-1 in an hneh a, an inringtawk hle. Mahse, inenchhinna leh a tak ram danzia temtirin an awm a, Spain chu match hmasa berah 3-0 in an ngam lo - an tlawm chiang hle.

Group B-a team nem bera chhal Albania lakah pawh Croatia an chuti lua lo a, 2-1 a hma an hruai reng avangin chak turin inbeisei mah se, hun pek belh minute nganaah Klaus Gjasula chuan Albania tan si phurh a sut a, 2-2 in an tawp.

Thawh a hun ta

World Cup 2018-ah Croatia-in final an lut a, Euro 2020-ah round of 16-ah tawp mah se, World Cup 2022-ah semifinal an thleng leh ngat - tun hnai major tournament-a an record avangin Croatia hian rin an hlawh hle.

Mahse, inelna takah chuan Croatia golden generation-in chuai lam an pan ve ṭan tih a lang a, captain Luka Modric, Manchester City midfielder Mateo Kovacic leh Marcelo Brozovic te inkawp hi hming aṭanga ringawta teh chuan hraw viau mah se, an kum a tam ve ta tih a lang.

Modric hi kum 38 mi ni tawhin, Real Madrid tan bul a ṭan meuh tawh lo a, Kovacic pawh City tan match 46 lai khel mah se, heng zinga match 16-ah hian bench aṭangin a lut a, match 15-ah lakchhuah a ni.

Brozovic-a'n sum tamna lam panin Saudi Pro League club Al Nassr tan a khel a, kum 31 mi midfielder hian inelna sang zawk a khelh loh miau avangin a uai thla ṭan der em ni aw, tih theih a ni a, Croatia midfield hmuhnawm kha tun thlengin kan la hmu lo.

Kan tho dawn

Croatia coach Zlatko Dalić-a'n a team a hrechiang a, an zam loh thu a sawi. Kum 57 mi coach chuan, "Round of 16 luh kan duh chuan hnehna kan chan a ngai alawm - Italy nena kan inkhel tur hi ka tan chuan knockout match ang a ni tawh.

"Kan chak lo a nih chuan Euro kan thlah mai a ngai dawn. Italy laka chak a awlsam lo ang tih ka ring a, mahse, chu chu Euro nih dan alawm! Team ṭha lo bik an awm lo a, kan tum ram thleng tur chuan hnehna kan chan a ngai a ni," a ti a, Italy lakah chak mamawh mah se, an zam loh thu a sawi tel bawk.

October 2017 aṭanga Croatia team enkawltu coach chuan, "Hetiang hun harsaah hian kan beidawng ngai lo. Kum sarih ka enkawl chhungin hetiang hun hi kan tawng fo a, match ropui tak tak kan khel a, kan chak zel. Tunah chuan chance duhawm kan nei leh ta," a ti a, an tan chuan game ropui pholan hun a nih thu a sawi.

Dalic hian squad a siksawi a rinawm a, Bruno Petkovic aiah season hman zawh taka Osasuna tana goal 18 khungtu Ante Budimir a luh a rinawm a, khel ṭha lo ṭhin Brozovic aiah kum 21 mi, Red Bull Salzburg midfielder Luka Sucic tan hun a awm thei bawk.

Engtin nge Italy?

Albania lakah game hmuhnawm pho chhuakin Italy an chak a, mahse, anmahni ang thoa champion tum Spain an tawn meuh chuan dawl zawrin an zawr - 1-0 lekin tlawm mah se, inkhel entute chuan scoreline-in gam a hrilhfiah lohzia an hmu ang.

Hei vang hian Italy coach, "Formation nghet ka nei lo" ti ngam ngat, a ṭul chuan player siksawi hreh lo Luciano Spalletti-a'n player a siksawi nualin a rinawm a, a bik takin Spain laka beisei phak lo Gianluca Scamacca, Jorginho leh Giovanni Di Lorenzo te chu thlak an nih a rinawm.

Midfield-ah Jorginho a talbuai tih phat rual a ni lo a, Arsenal midfielder aia lut turin AS Roma defensivide midfielder Bryan Cristante a lo inpeih at ang - tlarhmaah Scamacca a la nil viau bawk a, a aia lut turin goal nawr chak Mateo Retegui a awm.

Spain lakah Giovanni Di Lorenzo a mualpho a, player ṭhangduang Nico Williams-a'n a 'rep' a ni ber mai. Spalletti-a'n a chunga rinna nghah nawn ai chuan Italian fullback Matteo Darmian luhtir mai a thlan a rinawm - tun hi chak hun a ni tawh!