Beiseina kan la nei - Albania coach

Zaninah Croatia leh Italy an intawng dawn miau a, football fan-te he lam hi an hawi ṭhup ang. Mahse, Italy laka goal khung hmasa a, Croatia laka injury time-a si phurh sutna goal khungtu Albania an awm ve tih hriat a ṭha.

Albania hian zanin dar 12:30-ah vek Spain an hmachhawn dawn a, an chak chuan round of 16 an lut ang. Albania coach Sylvinho chuan, "Group stage paltlang thei dinhmunah kan la ding ve reng a, mi zawng zawng deuhthawin hetiang taka kan khingpuite kan hmachhawn theih hi an ring lo hial ang.

"Mi ṭhenkhat chuan match tina goal thum emaw goal li emaw tal chhuah ziah turah min ngai a, mahse, min en ula, beiseina kan la nei ve zel a ni," a ti a, an chunga mipui rinnain awmzia a neih loh thu a sawi - Spain hneh a tum.

Kum 50 mi Sylvinho hi Barzil left back ṭhin niin, 2004-09 inkar kha Barcelona tan a khel a, Spanish football hrechiangtu a ni. 2001-04 inkar kha Celta Vigo tan a lo khel tawh ṭhin bawk.

Mahse, Spain hi tun inelnaa team hmuhnawm ber pawl an ni a, hneh erawh an awlsam dawn lo. Match hnih an khelh tawhah Spain hian goal li an khung a, an lamah goal a la lut miah lo - mi tam takin Spain hian player khel tlem zawkte an luhtir an ring.

La Roja tan round of 16 thlirlawk a finthlak a, khel tlem zawkte coach Luis de la Feunte-a'n a luhtir a nih pawhin a mak lo ang. Mahse, Albania midfielder Nedim Bajrami chuan a harsat ngai renga a harsat a rin thu a sawi.

Bajrami chuan, "Tournament ṭha tak kan hmang mek a, Spain hmachhawn chu a awlsam lo ang tih a chiang. La Roja hian second emaw third team emaw an nei ve lo - an squad-a player zawng zawng hi top quality vek an ni a, tu nge lut a pawimawh ber lo," a ti a, an inbuatsaih ngai renga inbuatsaih a ṭul thu a sawi.

Spain hian Albania an hamchhawn tawh vawi riatah hnehna an chang vek a, vawi 31 goal khungin, goal thum chiah an chhuah ve - he thawnthu ngaihnawm lo hi Albania-in zaninah thlak danglam an tum ang.