Inkhel thiam Brazil inlan hun a thleng dawn

Football sawi chuan rilruah Brazil a lo lang ṭhin - world champion vawi nga an ni tawh a, anni aia champion hnem an awm loh avangin football nen a sawizawm an inhmeh bik.

Brazil hian Thawhlehni zing dar 6:30 hian Copa America 2024 an match hmasa ber an khel dawn, team ṭha Costa Rica nen an inhmachhawn nghal dawn avangin inkhel a hmuhnawm ang.

Tun hma aṭangin Brazil hian 'Super Star' an nei ṭhin - Pele, Ronaldinho leh Ronaldo te hun a liam a, player thiam bik Neymar an nei bawk. Tun ṭumah hian Neymar chu hliam vangin a inlan thei dawn lo a ni.

Brazil hian tournament dang ang lo takin mimal ṭha fal nalh tia sawi tur an nei lutuk hran lo. Chutihrualin, ram tana inlan phak ho chu khawvel huapa ṭha leh lar vek an ni thung.

Vinicius Junior hi Real Madrid tan chuan a changtupa nih tlin khawp a ni - champion theihna langsarah chuan a champion zel. Brazil tan erawh match 30 aṭangin goal thum chauh a la khung a ni.

Kum 23 mi a ni tawh a, vanglai a hmang mek - Vini tan Copa America hi ram tana hming chher theihna remchang a ni dawn, mimal chawimawina sang Ballon d'Or dawng thei tur phei chuan a pawimawh zual dawn hle.

Real Madrid forward pakhat zawk Rodrygo leh Barcelona hmatawng Raphinha an nei a, anni bakah hian Arsenal forward Gabriel Martinelli a la awm bawk, player an neih dan chhut chuan a sir lamah an hlauhawm zual ang.

Tlarhnung lam pawh tawnhriat nei ṭha Marquinhos-a'n a ho thei dawn, tun tournament atan captain Douglas Luiz leh Champions League nomawi chawi thei Eder Militao an nei bawk, an chesual viau a nih ngawt loh chuan champion turin player an nei ṭha.

Brazil coach Dorival Junior-a'n mit (eye) hliam vangin Ederson chhawr thei lo mah se Alisson an la nei tho a, si ban nghak turah an buai lo. Liverpool goalkeeper hi ram rana chuan khel tam leh rin hlawh zawk a ni bawk.