India tan Australia tih tlakna hun ṭha

T20 Cricket World Cup Super 8 hmawr bawk ṭan a ni a, inkhel a hmuhnawm bakah result a ngaihnawm. Champion rinkai Australia-in nimin zing khan Afghanistan an hneh lo a, tla thei dinhmunah an ding. Zanin dar 8:00 hian Aussies hian India an hmachhawn ang a, an chak lo a nih chuan semifinal an thleng zo lo ang.

India an che ṭha

Sir Vivian Richards Stadium-ah India leh Bangladesh te an inkhel a, Tigers-in vawm hmasak an thlang. Men in Blue opener Rohit Sharma (23) leh Virat Kohli (37) te an che ṭha a, an pahnih inkawp hian over li lekah 39 runs an siam hman.

Batter ṭha pahnihin hma an sial ṭha a, Rishabh Pant (36) che ṭha chhunzawmin Suryakumar Yadav-a'n (6) beisei pha lo mah se Shivam Dube (34) leh Hardik Pandya (50*) te an che ṭha a, India-in over 20-ah 196 runs siamin wicket nga an hloh.

Bangladesh tan target a sang hret a, captain Najmul Hossain Shanto-a'n 40 runs siam mah se thlawptu a nei ṭha lo. India bowler-te ṭum dang ang bawkin an che ṭha a, Tigers-in over 20-ah 146/8 runs chauh an siam. Men in Blue 50 runs-in an chak a, semifinal lut turin an dinhmun a ṭha hle.

Aussies ngamtu Afghan

Afghanistan-in group stage-ah New Zealand an vaw tla tawh a, Super 8-ah team ṭha Australia an hneh. Arnos Vale Stadium-ah Aussies-in vawm hmasak an thlang a, chak mamawh Afghanistan-in an hlau bik lo. Opener pahnih Rahmanullah Gubaz (60) leh Ibrahim Zadran (51) ten half century an siam ve ve a, thlawptu dang ṭha nei lo mah se over 20-ah 148/6 runs an siam.

Australia hi chak tur thoa ngaih ni mah se Afghan bowler hmaah an zawr. Opener Travis Head-a'n run khat pawh a siam lo a, player 11 zinga player pariatin 10 runs an siam tling lo. Glenn Maxwell-a'n 59 runs a siam a, hei hi chakpui tham ni lo mah se mualpho lutuk tur hliahkhuhna a ni.

Afghan bowler Gulbadin Naib-a'n wicket li a la a, 20 runs chauh a pe. Naveen ul Haq pawhin wicket thum lain 20 runs a pe a, World Cup inelnaah record nei ṭha Australia chu 21 runs-in an hneh.

World Cup-ah hian India ngam loh ber chu Australia a ni a, tun hi India tan Aussies tih tlakna hun ṭha a ni. Men in Blue-in zanina Australia an hneh a; June 25, Thawhlehni zinga Afghanistan-in Bangladesh an hneh bawk chuan Mitchell Marsh leh a ṭhiante hi an tla ang.